25.06.2019-njy Ak bugdaý etrabynyň çägindäki senagat zolagynda ýuwujy serişdeleriniň öndürýän kärhananyň açylyş dabarasy boldy. Medeniýet we sungat işgärleriniň hem-de Magtymguly Pyragynyň şygryýet gününiň öňüsyrasynda toý ruhuna beslenip, ulanylmaga berlen täze kärhana Türkmenistanyň Senagatçylar we telekeçiler birleşmesiniň agzasy “Bagtly zamana” hojalyk jemgyýetine degişlidir. Dabara welaýat we Ak bugdaý etrap häkimlikleriniň ýolbaşçylary, Türkmenistanyň Mejlisiniň deputatlary, welaýatyň edara-kärhanalarynyň ýolbaşçylary, jemgyýetçilik  guramalarynyň wekilleri, Türkmenistanyň Senagatçylar we telekeçiler birleşmesiniň agzalary, il sylagly ýaşulular, mährem eneler we ýaşlaryň uly topary gatnaşdy.

     Mälim bolşy ýaly, täze taryhy döwrümizdeähli pudaklarda hususy eýeçiligi, kiçi we orta telekeçiligi goldamak arkaly, senagatçylar we telekeçiler gatlagyny yzygiderli ösdürmekde guwandyryjy işler alnyp barylýar. Mmunuň özi  ýurdumyzda içerki bazarlar we eksport üçin ýokary hilli önümçilikleri döretmek, ekologiýa taýdan arassa önümleriň önümçiligini giňeltmek we  ilatyň iş bilen üpjünçiligini ýokarlandyrmak boýunça öňde durýan wezipeleriň üstünlikli durmuşa geçirilmegine ýardam edýär. Soňky ýyllarda welaýatymyzyň çäginde, ylaýta-da, Ak bugdaý etrabynyň çägindäki senagat zolagynda ykdysadyýetiň döwlete dahylsyz pudagynyň wekillerine degişli bolan täze önümçilikleriň sanynyň barha artmagy has-da buýsançlydyr. Ýuwujy serişdelerini öndürýän täze, häzirki zaman kärhanasy şol önümçilikleriň üstüni ýetirdi.

    Täze kärhana giň çägi öz içine almak bilen, özboluşly önümçilik şäherçesini ýatladýar. Düýn bu künjek göze has ýakymly we gözel göründi. Toý ruhuna beslenen kärhananyň daş-töwegine ýygnananlaryň ýüzlerinde şatlyk we buýsanç alamatlary uçganaklaýardy. Aýdym-sazly çykyşlaryň joşgunly mukamlary, hoş owazlary günüň saba-säherinde hemmeleriň keýpiçaglygyna ruhubelentlik goşdy.

    Toý meýdançasyna welaýat häkimi Serdar Berdimuhamedowyň gelmegi bilen, ol ýerdäki ruhubelentlik al-asmana göterildi. Welaýat häkimi täze desgalar toplumyny öz içine alýan kärhananyň toý bagyny dabaraly ýagdaýda kesdi. Bu taryhy pursatda aýdym-sazlaryň, milli öwüşginli tans-halk döredijilik çykyşlary giň gerimde ýaýbaňlandyryldy. Welaýatymyzyň tanymal sungat ussatlarynyň bu ýerdäki joşgunly çykyşlarynda döwrümiziň buýsançly waspy öz beýanyny tapdy.

    Welaýat häkimi Serdar Berdimuhamedow aýdym-sazly çykyşlary synlandan soňra, täze kärhana bilen tanyşdy. Esasy önümçilik binada görkezilen wideorolikde täze, häzirki zaman kärhanasynyň işi we giň mümkinçilikleri hakynda gürrüň berildi. Daşary ýurtlardan getirilýän harytlaryň ornuny tutýan önümleriň, şeýle hem eksporta niýetlenen önümleriň öndürilişini artdyrmak boýunça tagallalarda möhüm orun eýelejek täze kärhanada ýuwujy serişdeleri tozanlandyrylyp, guratma usulynda öndürmäge niýetlenendir. Munuň üçin önümçilik desgalarda ähli şertlerdir mümkinçilikler göz öňüne tutulypdyr. Ýuwujy serişdeleri öndürmek üçin niýetlenen desganyň taslamasy Italiýa döwletiniň “Mersina” kompaniýasy tarapyndan ýerine ýetirilipdir. Taýýar önümi gaplamak işini bolsa, Italiýanyň “Essegi” kompaniýasynyň enjamlary  ýerine ýetirer.  Bu ýerde işleriň esasy bölegi  kompýuterleşdirlendir.

     Dabara gatnaşyjy myhmanlar önümçilik desgasynda bolanlarynda, dürli lybaslary we gap-gaçlary ýuwmaga niýetlenen serişdeleriň öndürilişi bilen ýakyndan tanyşdylar. Bu ýerde sagatda 5 tonna kir ýuwujy serişdelerini gaplamaga ukyply bolan enjam arkaly taýýar önümiň 1; 3; 6; 9 kilogramlyk polietilen gaplara gaplanylyşyny synlamaga mümkinçilik aldylar. Ýeri gelende, bu ýerde öndürilýän önümleriň hiliniň ýokarydygy bilen tapawutlanýandygyny bellemek gerek. Şol önümleriň bir bölegi daşary ýurtlara eksport ediler.

     Dabara gatnaşyjy myhmanlar kärhananyň enjamlaşdyrylyşyna we işleriň sazlaşykly guralyşyna uly baha berdiler hem-de ol ýerde zähmet çekmek mükminçiligine eýe bolan ýaşlara üstünlik arzuw etdiler.