Hormatly Prezidentimiziň Karary bilen tassyklanan Gündogaryň beýik akyldary we nusgawy şahyry Magtymguly Pyragynyň doglan gününiň 300 ýyllygyny dabaraly bellemek boýunça geçirilmeli çäreleriň Meýilnamasyna laýyklykda, ýurdumyzda we daşary döwletlerde meýilleşdirilen çäreler barha giň gerime eýe bolýar.

Berkarar döwletiň täze eýýamynyň Galkynyşy döwründe Magtymguly Pyragynyň döredijilik mirasy ähli ynsanlaryň köňlünde uly orun eýeleýär. Şahyryň eserleri ýyllar, asyrlar geçse-de, özüniň gymmatyny ýitirmeýär. Akyldaryň şygyrlarynda öňe sürülýän pikirler umumadamzat gymmatlyklarynyň derejesinde durýar. Çünki akyldar şahyryň döredijiliginiň mazmuny belent adamkärçilik, ahlaklylyk, ynsanperwerlik ýörelgelerine ýugrulandyr. Magtymgulynyň goşgularynda watansöýüjiligiň belent waspynyň bardygy bolsa onuň gymmatly mirasynyň has-da ýokarydygyny beýan edýär. Türkmen halkynyň dana şahyry Magtymguly Pyragynyň edebi mirasy Watana, onuň abadan, parahat durmuşyna, keremli topragyna bolan beýik söýgä, belent duýga eýlenendir.

Magtymguly atamyzyň dürdäne döredijiligi halkymyzyň milli ruhy ýörelgesi bilen birlikde, umumy ykrar edilen kanunalaýyklyk, halkymyzyň ruhy sütüni hökmünde Garaşsyz Diýarymyzyň täze taryhyna girdi. Ol umumy milli ruhy garaýyş bolup, ýurdumyzyň Konstitusiýasy bilen berk bitewi güýje eýedir.

Magtymguly atamyz berkarar döwlet gurmak hakdaky garaýyşlarynda döwletiň hem-de halkyň ösüşde, özgerişde bolmagyny, ony bolsa belent watansöýüjilikli halkyň amal edýändigini tekrarlaýar.

Goý, Arkadagly Serdarymyzyň, Gahryman Arkadagymyzyň beýik işlerine hemişe belent ösüşler, rowaçlyklar ýaran bolsun! 

Maýsa HOJAÝEWA,

Döwletmämmet Azady adyndaky
Türkmen milli dünýä dilleri
institutynyň talyby.