Ýurdumyzda ýaş nesliň terbiýesi we bilim berlişi döwlet syýasatynyň ileri tutulýan ugurlarynyň biridir. Bu ugurda alnyp barylýan yzygiderli işler milli ruhy gymmatlyklarymyzy gorap saklamaga hem-de täze şertlere laýyklykda ösdürmäge gönükdirilendir. Şol gymmatlyklaryň arasynda türkmen dili, edebiýat we sözleýiş medeniýeti aýratyn möhüm orun eýeleýär. Bu sütünleriň pugtalandyrylmagynda bolsa pedagogikanyň — okuw-terbiýeçilik ulgamynyň orny örän uludyr.

Türkmen dili diňe bir gepleşik serişdesi bolman, halkymyzyň taryhyny, medeni mirasyny, pähim-paýhasyny we dünýä garaýşyny özünde jemleýän milli gymmatlykdyr. Onuň inçe aýratynlyklaryny ýaşlara dogry, düşnükli we ylmy esasda ýetirmek tejribeli mugallymlaryň hem-de dil öwredijileriň esasy wezipesi bolup durýar. Pedagoglar okuwçylara diliň grammatik gurluşyny öwredip, olaryň arassa, çeper we medeniýetli geplemek endigini ösdürýärler.

Edebiýat sapaklarynyň hem ýaş nesliň kemala gelmeginde aýratyn ähmiýeti bar. Klassyk we häzirki zaman türkmen edebiýatyna degişli eserleriň öwrenilmegi arkaly okuwçylaryň döredijilik ukyby, pikirleniş giňişligi hem-de milli medeniýete bolan hormaty artýar. Şeýle eserleri okamak we seljermek ýaşlarda döwrüň möhüm meselelerine garaýyş döretmäge hem-de maglumatly çykyş etmäge mümkinçilik berýär.

Pedagogikanyň ähli ugurlarda utgaşykly hereket etmegi türkmen dili, edebiýat we sözleýiş medeniýetiniň häzirki döwrüň talaplaryna laýyk derejede ösdürilmegine mümkinçilik berýär. Munuň özi zehinli, giň garaýyşly, milli medeniýetine hormat goýýan ýaş nesliň kemala gelmegine ýardam edýär.

Gülnar BERKELIÝEWA,

Türkmenistanyň Döwlet energetika
institutynyň mugallymy.