Türkmenistan  iri  pagta  öndüriji  ýurt  bolmak  bilen,  ýurdyň  dokma  senagaty işjeň  ösdürilýär.  Garaşsyzlyk  ýyllarynda  30-dan  gowrak  iri  we  orta  ululykdaky  dokma  toplumlary,  fabrikleri  işe  girizildi.  Olar  çig  mal  binýadynyň  gönüden-göni  golaýynda  ýerleşmek  bilen  pagta  süýümini  gaýtadan  işlemekden  başlap,  taýýar  önüm  çykarmaga  çenli  önümçiligiň  yzygiderliligini  doly  üpjün  edýär. 

         Daşary  ýurtlaryň  iň  öňdebarjy  kompaniýalarynyň  ýokary  öndürjilikli  täze  tilsimat  enjamlary  we  maşynlary  bilen  üpjün  edilen  dokma  senagat   kärhanalary  jinsi,  sütükli,  panbarhat,  trikotaž,  setin,  çit  we  beýleki  matalary,  hem-de  şolardan  tikilýän  taýýar  önümleri,  şeýle  hem  lukmançylykda  ulanylýan  pamyk  hem-de  kosmetik  pamygy  uly   möçberde  öndürýär.  Häzirk  wagtda  Türkmenistan  dünýä  bazarlarynda  uly  isleg  bildirilýän  ýokary  hilli  dokma  önümlerini  köp  möçberde  öndürýän  döwletiň  derejesinde  eýe  boldy.  Türkmenistanyň  dokma  toplumynyň  öndürýän  önümleriniň  70%-den  gowragy,  şol  sanda  pagta  süýümi  ýüpligi,  nah  matalar,  trikotaž  matalaryň  dürli  görnüşleri  we  olardan  tikilen  taýýar  önümleri  dünýäniň  30-dan  gowrak  ýurtlaryna  eksport  edilýär.

      “Türkmenistanyň Prezidentiniň ýurdumyzy 2018-2024-nji ýyllarda durmuş-ykdysady taýdan ösdürmegiň maksatnamasyna” laýyklykda  07.03.2018-nji  ýylda Kaka etrabynda  hem  täze  dokma  senagat toplumynyň  düýbü  tutuldy. Döwlet Baştutanymyz Gurbanguly Berdimuhamedowyň Kararyna laýyklykda, bu  senagat  toplumy  egirme, dokma, boýag we tikin önümçiligini öz içine alýar.  Toplumda  ýylda inçe süýümli pagtanyň 5 müň tonnasyny, ondan “kompakt-penýe” belgili nah ýüplügiň 3 müň 650 tonnasyny öndürmäge niýetlenen önümçiligi, 12 million inedördül metr matany hem-de 1 million 200 müň taýýar önümi öndürmäge mümkinçilik  bolar.  Bu  iň  ýokary tehnologiýaly dokma kärhanasyny gurmak “Cotam Enterprises Ltd.” türk kompaniýasyna ynanyldy. Toplum meýilnama esasynda 2021-nji ulanylmaga berilmeli. Bu çözgüt milli ykdysadyýetimizi ösdürmegiň strategiýasyny durmuşa geçirmegiň ýolunda möhüm  ädim boldy. Bu  dokma  toplumynyň  düýbüniň tutulyş dabarasynda Halkyň saýlan wekilleriniň adyndan milli parlamentde Ahal welaýatynyň 24-nji saýlaw okrugynyň ýaşaýjylarynyň bähbitlerine wekilçilik edýän Mejlisiň deputaty Serdar Berdimuhamedow çykyş edip, pudagyň bu desgasynyň ýurdumyzda giňden bellenilýän şanly sene-Halkara zenanlar gününiň öň ýanynda düýbüni tutmak dabarasynyň geçirilýändiginiň buýsançly ýagdaýdygyny belledi. Çünki ýurdumyzyň dokmaçylarynyň zähmet toparlarynyň üçden iki böleginden gowragyny zenanlar düzýär, olar dokma önümçiliginiň öňdebaryjy tehnologiýalaryny üstünlikli özleşdirýärler we arassa çig maldan ekologiýa taýdan arassa önümleri öndürýärler bu önümler häzirki wagtda türkmen eksportunyň uly bölegini düzüp, hili hem-de bezegi bilen daşary ýurtly alyjylary özüne çekýär  diýip  belledi.  Şeýle  hemtäze dokma toplumynda  1000-den  gowrak  iş orunlarnyň  açyljakdygyny  nygtap  aýtdy. Munyň  özi  ilatyň  durmuş  derejesini  ýokarlandyrmaga  ýardam  berer diýip  nygtady. 

      Bu  gurulýan  desga ýurdumyzyň senagatyny pudaklar boýunça ösdürmek, sebitleri durmuş-ykdysady taýdan ýokary götermek, ilaty iş orunlary bilen üpjün etmek we halkyň abadançylygyny ýokarlandyrmak boýunça hormatly Prezidentimiz Gurbanguly Berdimuhamedowyň maksatnamalaryny durmuşa geçirmek ugrundaky netijeli çäreleriň aýdyň subutnamasydyr.