Tokio şäher häkimliginiň mejlisinde kabul edilen täze karara laýyklykda paýtagtyň ähli ýerinde «uglerod zyňyndylarynyň azalmagyna goşant goşmak» maksat edilýär. Karara görä, 2025-nji ýylyň aprelinden soň bina ediljek täze ýaşaýyş jaýlaryna gün panellerini ornaşdyrmak zerur bolar.

Milli metbugatda berlen habarda, täze kararyň şäherdäki 50-den gowrak iri potratçynyň täze taslamalaryna täsir edip biljekdigi bellenilýär. Tokio şäher häkimligi şäherdäki binalaryň eýýäm 4 göteriminde gün panelleriniň bardygyny aýdýar.

Häkimlik, 2000-nji ýylda uglerod zyňyndylary bilen deňeşdirilende 2030-njy ýyla çenli parnik gazlarynyň zyňyndylaryny iki esse azaltmagy maksat edinýär.

Mälim bolşy ýaly, soňky  ýyllarda dünýäde pes uglerodly, hususan-da, wodorod energiýasy hem-de energiýanyň gaýtadan dikeldilýän çeşmelerinden peýdalanmaga uly üns berilýär. Birnäçe döwletler we kompaniýalar uglerod zyňyndysy pes derejede bolan dünýä taýýarlanmak bilen, ekologiki taýdan arassa energiýa maýa goýumlaryny artdyrýarlar. Munuň üçin «nol uglerodly» dünýä maksatnamasyny işläp taýýarlaýarlar.

Belläp geçsek, dünýä jemgyýetçiligi bilen bir hatarda ýurdumyzda hem howanyň üýtgemegine garşy göreşmek maksady bilen «ýaşyl» ykdysadyýet ugruna uly ähmiýet berilýär. 

Asman KURBANOW, 

Türkmen döwlet binagärlik-gurluşyk 
institutynyň talyby.