Ynha şeýle at bilen Ak bugdaý etrabynyň Änew şäherindäki ,,Bagt ýyldyzy’’ toý mekanynda Ak bugdaý etrap häkimliginiň, etrap jemgyýetçilik guramalarynyň, şeýle-de etrap medeniýet bölümi bilen bilelikde gurnamaklarynda Halkara Zenanlar güni mynasybetli ,,Ýurdymyz berkarar-zenanlar bagtyýar’’ diýen at bilen aýdym-sazly medeni çäre geçirildi. Etrabyň dürli kärde zähmet çekýän kalby buýsançdan doly bagtyýar raýatlaryň, bilim we saglyk işgärleriniň, şeýle-de ýokary synpda okaýan mekdep okuwçy gyzlarynyň, ýaşuly nesliň wekilleri bolan kümüş saçly enelerimiziň gatnaşmaklarynda geçirilen bu aýdym-sazly medeni çäre aýratyn bir many-mazmuna eýe boldy. Etrapda bar bolan medally zenanlaryň, 8 we ondan köp çagany terbiýeläp ýetişdiren eneleriň gatnaşmagy hem bellärliklidir. Etrabyň medeniýet we sungat ussatlarynyň ýerine ýetiren aýdymdyr-sazlary dabara gatnaşyjylara aýratyn ruhy-lezzet paýlady. Türkmenistanyň at gazanan medeniýet işgäri Oguljemal Çaryýewanyň we ,,Garagum’’ žurnalynyň bölüm redaktory Nurtäç Annamuhammedowanyň okap beren goşgulary, tymsallary halk köpüçliginde aýratyn täsir galdyrdy. Ata Watanymyzyň topragyndan  önýän, şeýle-de ýurdymyzda  öndürilýän nazy-nygmatlardan bezelen türkmen desterhanynyň başynda ýüzleri nurana zenanlar özleri baradaky edilýän aladalar dogrusynda Hormatly Prezidentimize özleriniň çäksiz minnetdarlyklaryny, alkyşly sözlerini  beýan etdiler. Dabaranyň ahyrynda dabara gatnaşyjy zenanlara, mährem enelere, şeýle-de gyzlara etrap jemgyýetçilik guramalary tarapyndan ter gül desseleri dabaraly ýagdaýda gowşuryldy.