Türkmenistan Garaşsyzlygynyň şanly 30 ýyllyk baýramynyň giňden belleniljek ýyly bolan “Türkmenistan-parahatçylygyň we ynanyşmagyň Watany” ýylynda halkymyz toý-baýramlarymyzy uly dabara bilen belläp geçýär. Şeýle baýramçylyklaryň biri hem ýurdumyzda her ýylyň 27-nji ýanwarynda uly ruhubelentlikde bellenip geçilýän Watan goragçylarynyň we Türkmenistanyň Ýaragly Güýçleriniň döredilen günidir. Döredilen wagtyndan bäri geçen 29 ýylyň dowamynda Türkmenistanyň Ýaragly Güýçleriniň binýady döwrebap söweş tehnikalary we tilsimatlary bilen berkidilip, ýurdumyzyň çäk bitewüliginiň hem-de halkymyzyň abadan durmuşynyň ykraryna öwrüldi. Halkymyzyň taryhynda öçmejek yz galdyran gahryman pederlerimiziň watansöýüjilik, gaýduwsyzlyk, ynsanperwerlik we dost doganlyk ýörelgelerini harby däplerine ornaşdyran Milli goşunymyz bu günki gün eziz Watanymyzyň we mähriban halkymyzyň guwanjydyr. Durmuşa geçirilýän harby özgertmeleriň netijesinde parahatçylygy maksat edinýän Ýaragly Güýçlerimiziň harby sungaty hem-de harby gullukçylaryň harby hünär başarnygy we söweşjeň taýýarlygy has-da kämilleşýär. Türkmenistanyň Ýaragly Güýçleri islendik döwürde Watanymyzy gala bolup goramaga taýýarlygymyzyň kuwwatly binýady bolmalydyr. Watany goraýan gaýratly, merdana harby gullukçylar gadymy hem müdimi halkymyzyň gerçeklik mekdebiniň mynasyp dowamydyr. Watan goragynyň biziň süňňümizde, janymyzda ýaşaýandygynyň güwäsidir. Ýaş merdana harby gullukçylaryň uçganaklaýan nazarlary, olaryň batyrgaý keşbi ata-babalaryň gaýratlylyk, mertlik, sabyrlylyk, asyllylyk, edeplilik ündewlerine wepalylygyň alamatydyr» diýip belleýär. Berkarar döwletimiziň bagtyýarlyk döwründe Watan goragçylarynyň gününiň giňden bellenilmegi döwletimiz tarapyndan Ýaragly Güýçlerimiziň harby gullukçylaryna hormatyň we olar hakda edilýän aladalaryň nyşanydyr. Merdana Watan goragçylaryna bildirilýän ynam eziz Watanymyzyň, mähriban halkymyzyň beýik ynamydyr.