Hususy kärhana “Аjaýyp-gurluşyk” Daşoguzda täze saglyk merkeziniň gurluşygyny alyp barýar. Bu barada Türkmenistanyň resmi metbugaty habar berdi.

Täze lukmançylyk saglyk merkezi Daşoguz halkara howa menziline barýan awtoulag ýolunyň ugrunda täze ýaşaýyş jaý toplumynda  gurulýar. Iki gatly täze binanyň umumy meýdany ýarym gektara deň bolup, onuň düýbi tutuldy we birinji gat direglerini gurmak boýunça işler alnyp barylýar. Habar berlişi ýaly, täze merkezde registratura, administratiw we lukmançylyk bölümleri, bejeriş otaglary, barlaghana, dermanhana we beýleki zerur jaýlar bolar. Täze Saglyk merkezi ilata giň bejeriş we anyklaýyş hyzmatlaryny hödürleýän häzirki zaman lukmançylyk enjamlary bilen enjamlaşdyrylmagy meýilleşdirilýär.

Bina Daşoguzyň iň köp ilatly ýerleriniň birine öwrüljek täze toplumyň ýaşaýjylaryna hyzmat etmek üçin niýetlenendir. «Saglyk» Döwlet maksatnamasyna laýyklykda, ýurdumyzyň beýleki sebitlerinde bolşy ýaly, Daşoguz welaýatynda hem saglygy goraýyş pudagyny mundan beýläk-de ösdürmek üçin giňişleýin çäreler üstünlikli durmuşa geçirilýär.

Soňky ýyllarda Daşoguzda 450 orunlyk häzirki zaman köp ugurly hassahanany we 150 orunlyk onkologiýa klinikasyny öz içine alýan köp sanly täze bina işe girizildi.

Aýgül GANDYMOWA,
Türkmen Döwlet Maliýe institutynyň
1-nji ýyl talyby.