Berkarar döwletiň täze eýýamynyň Galkynyşy döwründe «Halkyň Arkadagly zamanasy» diýen şygar astynda geçýän 2022-nji ýylda belent mertebeli Prezidentimiz Serdar Berdimuhamedowyň parasatly baştutanlygynda bedew bady bilen ösüşleriň täze belentliklerine galýan eziz Watanymyz hemişelik Bitaraplyk halkara hukuk ýagdaýyna eýe bolmagynyň 27 ýyllyk toýuna barýar. Agzybir halkymyz özüniň döwletlilik ýörelgesine eýerip, Arkadagly Serdarymyzyň daşyna pugta jebisleşip, bu ajaýyp baýramçylygy uly zähmet üstünliklerine besleýär. Geçirilýän dabaralarda ýurdumyzyň gazananlaryna, hoşniýetli goňşuçylyk gatnaşyklaryna, parahatçylyk söýüjilik, oňyn Bitaraplyk ýörelgelerine esaslanýan netijeli halkara hyzmatdaşlygy öz beýanyny tapýar.

Ýurdumyzyň Bitaraplyk hukuk ýagdaýy halkara giňişliginde bitaraplyk we öňüni alyş diplomatiýasyna laýyklykda, netijeli gepleşikleri geçirmäge, oňyn başlangyçlary öňe sürmäge, bitaraplyk syýasatyny döredijilikli ösdürmäge berk esas döredýär. Birleşen Milletler Guramasynyň Baş Assambleýasynyň 69-njy mejlisinde 193 döwlet tarapyndan biragyzdan gaýtadan kabul edilen «Türkmenistanyň hemişelik bitaraplygy» atly Rezolýusiýada Garaşsyz döwletimiziň Merkezi Aziýada we Hazar sebitinde hyzmatdaşlygy mundan beýläk-de pugtalandyrmaga gönükdirilen oňyn başlangyçlarynyň goldanylýandygy, türkmen Bitaraplygynyň geoykdysady taýdan sebit hem-de dünýä ösüşine oňyn täsir edýändigi bellenilýär. Rezolýusiýada hemişelik Bitarap döwletimiziň energiýa serişdelerini durnukly üstaşyr geçirmäge, ygtybarly ulag-kommunikasiýa geçelgelerini döretmäge degişli başlangyçlaryna goldaw bildirilýändigi, çylşyrymly, adatdan daşary hadysalar hem-de tebigy heläkçilikler zerarly kyn ýagdaýda galan ýurtlara we halklara ynsanperwer kömegini bermekde Türkmenistanyň oňyn ornunyň ykrar edilýändigi hem nygtalyp bellenilýär.

Biziň ýurdumyz sebitde we bütin dünýäde durnuklylygy, howpsuzlygy üpjün etmek çygrynda hyzmatdaşlygy pugtalandyrmaga uly üns gönükdirýär. Parahatçylyk, ösüş, hyzmatdaşlyk ählumumy abadançylygy üpjün etmegiň möhüm şerti bolup durýar. Diaolog, ikitaraplaýyn we köptaraplaýyn gepleşikler arkaly döwrüň möhüm wezipelerini çözmek, geljekki ösüş meýilnamalaryny düzmek, durmuşa geçirmek derwaýys ugur bolup durýar.

Türkmeniň Bitaraplyk ýörelgesini dabaralandyryp, dünýäniň täze keşbiniň düýpli binýatlaryny kemala getirmek ugrunda ýadawsyz alada edýän, ýurdumyzy we halkymyzy ösüşiň rowana ak ýollary bilen täze belentliklere alyp barýan hormatly Prezidentimiziň jany sag, ömri uzak bolsun, il-ýurt we tutuş adamzat ähmiýetli tutýan tutumly işleri mydama rowaçlyklara beslensin!

Kerim ORAZOW, 

Türkmen döwlet binagärlik-gurluşyk 
institutynyň talyby.