Şu gün paýtagtymyzda Telearagatnaşyk, telemetriýa, habar beriş tilsimatlarynyň we teleradioýaýradyş enjamlarynyň «Türkmentel-2024» atly XVII halkara sergisi we ylmy maslahaty üstünlikli tamamlandy. Forum Türkmenistanyň hünärmenleri bilen daşary ýurtly hyzmatdaşlaryň arasyndaky tejribe alyşmak, özara hyzmatdaşlygy ösdürmek we täze innowasion taslamalary durmuşa geçirmek üçin möhüm platforma boldy.

Forumyň çäklerinde «Sanly çözgüt – 2024» atly innowasion taslamalar bäsleşiginiň ýeňijileri yglan edildi we olara gymmat bahaly sowgatlar hem-de diplomlar gowşuryldy. Bäsleşik ýaşlaryň innowasion pikirlerini goldamak, sanly bilimi ösdürmek, ykdysadyýete we beýleki pudaklara täze sanly çözgütleri çekmek maksady bilen geçirilip, onda ýokary okuw mekdepleriniň talyplary we hünärmenleri öz taslamalary bilen çykyş etdiler.

Bäsleşigiň dowamynda saglygy goraýyş, ylym we bilim, elektron senagaty, ulag we logistika, oba hojalygy, hyzmatlar ulgamy, robototehnika ýaly ugurlar boýunça sanly we innowasion çözgütler hödürlenildi. Häzirki wagtda ýeňiji bolan taslamalary durmuşa geçirmek boýunça degişli işler alnyp barylýar.

Bäsleşikde ýeňiji bolan taslamalar

Saglygy goraýyş ugry – Baýnazar Muhammedow (Türkmenistanyň Telekommunikasiýa we Informatika Instituty) PECS cards adaty däl adamlaryň aragatnaşyk mümkinçiliklerini gowulandyrýan programma bilen birinji orny eýeledi.

Emeli aň ugry – Şatlyk Şöhradow (Oguz han adyndaky Inžener-tehnologiýalar uniwersiteti) ýedi dürli keseli anyklamak we bejermek üçin emeli aň kömegi bilen işläp düzülen programmany hödürläp, ýeňiji boldy.

Robototehnika we awtomatizasiýa ugry – Ýazmuhammet Agamyradow (Oguz han adyndaky Inžener-tehnologiýalar uniwersiteti) gurluşykda we keramika önümçiliginde ulanyljak täze görnüşli 3D printer taslamasy bilen tapawutlandy.

Akylly oba hojalyk tehnologiýalary – Alýoş Amanow (Türkmenistanyň Döwlet energetika instituty) plastiki zyňyndylary ýygnamak we sanly ulgam arkaly dolandyrmak üçin döredilen "Akylly gämi" taslamasy bilen birinji orna mynasyp boldy.

Smart City ugry – Emir Şammaýew (140-njy orta mekdep) ýörän wagtynda basyşdan elektrik toguny öndürýän enjamy bilen birinjiligi eýeledi.

Bilim we elektron okuw ugry – Arslan Bäşimow (Türkmenistanyň Milli Howpsuzlyk Instituty) tebigy taryhy we medeni ýadygärlikleri fotogrometriýa arkaly öwrenmek taslamasy bilen ýeňiji boldy.

Hyzmatlar ulgamy – Artur Bahtyýarow (Aşgabat şäheriniň 129-njy orta mekdebi) «Tick» atly sosial ulgam we messenjer taslamasy bilen bäsleşikde birinji orny eýeledi.

Ýurdumyzda halk hojalygynyň ähli pudaklaryny sanlylaşdyrmak, önümçilige ylmy işläp taýýarlamalary ornaşdyrmak boýunça giň gerimli maksatnamalar durmuşa geçirilýär. Bu işler pudaklaryň işini döwrebaplaşdyrmaga we innowasiýa mümkinçiliklerini artdyrmaga gönükdirilendir.

Döwlet Baştutanymyz sanly bilim ulgamyny ösdürmegiň möhüm ugurlarynyň biridigini belleýär we bu maksat bilen degişli Konsepsiýa kabul edilip, ýurdumyzyň ýokary okuw mekdeplerinde sanly bilimiň ulgamlaýyn üpjünçiligi ornaşdyrylýar. «Türkmentel-2024» halkara sergisiniň we «Sanly çözgüt – 2024» innowasion bäsleşiginiň üstünlikli geçirilmegi ýurdumyzyň sanly ösüş ýoly bilen ilerleýändiginiň aýdyň subutnamasydyr.