Duşenbe şäherinde iş sapary bilen bolan hormatly Prezidentimiz Serdar Berdimuhamedow Täjigistan Respublikasynyň Prezidenti Emomali Rahmon bilen duşuşdy. Bu barada Türkmenistanyň resmi metbugaty habar berdi.

Täjik Lideri türkmen döwlet Baştutanyny mähirli garşylap, saparyň iki ýurduň arasyndaky dostluk we hyzmatdaşlyk gatnaşyklaryny has-da berkitjekdigini belledi. Hormatly Prezidentimiz myhmansöýerlik üçin minnetdarlyk bildirip, türkmen halkynyň Milli Lideri Gahryman Arkadagymyzyň mähirli salamyny ýetirdi.

Duşuşykda taraplar halkara syýasatyň möhüm ugurlary boýunça garaýyşlarynyň meňzeşdigini nygtadylar. Türkmenistan bilen Täjigistan BMG-niň çäklerinde üstünlikli hyzmatdaşlyk edip gelýärler, özara goldawly başlangyçlary öňe sürýärler.

Taraplar söwda-ykdysady, medeni we ylym-bilim ugurlarynda hyzmatdaşlygy giňeltmegiň möhümdigini hem aýtdylar. Duşuşygyň ahyrynda Serdar Berdimuhamedow we Emomali Rahmon iki döwletiň dostluk gatnaşyklaryny mundan beýläk-de ösdürmäge ygrarlydyklaryny tassykladylar.

Daýanç NURÝAGDYÝEW,

Türkmenistanyň Prezidentiniň ýanyndaky Döwlet gullugy
akademiýasynyň diňleýjisi.