Mälim bolşy ýaly hormatly Prezidentimiz Serdar Berdimuhamedowyň Hytaý Halk Respublikasyna resmi sapary dowam edýär.

Döwlet Baştutanymyz, Hytaý Halk Respublikasyna döwlet saparynyň öň ýanynda bu ýurduň dünýäde meşhur neşirleriniň biri bolan «Ženmin Žibao» gazetiniň redaksiýasynyň haýyşy boýunça, «Strategik hyzmatdaşlygyň ygtybarly binýady» atly makalasyny taýýarlady. Makalada iki ýurduň arasynda köklerini asyrlaryň jümmüşinden alyp gaýdýan deňhukuklylyk, özara hormat goýmak ýörelgelerine esaslanýan gatnaşyklara düýpli seljerme berilýär hem-de hyzmatdaşlygyň has-da ýokary derejä çykaryljakdygyna ynam bildirilýär.

Arkadagly Serdarymyz makalasynda iki dostlukly ýurduň halkara giňişlikde birek-biregiň başlangyçlaryny goldaýandyklaryna, tutuş adamzadyň öňünde durýan möhüm wezipeler babatda garaýyşlarynyň gabat gelýändigine ýa-da ýakyndygyna ünsi çekýär. 

« - Biz Hytaýyň Türkmenistanyň Bitaraplyk hukuk derejesine hem-de ýurdumyzyň bu derejä esaslanýan daşary syýasat ugruna hormat goýýandygyna ýokary baha berýäris. Öz nobatynda, Türkmenistan hemişe hytaýly hyzmatdaşlarymyz üçin möhüm bolan meselelere, şol sanda Hytaý Halk Respublikasynyň çäk bitewüligine hem-de jebisligine dahylly ýagdaýlara öz garaýyşlaryny anyk we kesgitli beýan edýär, «Bitewi Hytaý» syýasatyna berk eýerýär » 

 - diýip, hormatly Prezidentimiz Serdar Berdimuhamedow makalasynda nygtaýar. 

Yslam TYLLANUROW,

Türkmen döwlet binagärlik we
gurluşyk institutynyň Inžener-mehanika
fakultetiniň dekany.