Hormatly Prezidentimiz Serdar Berdimuhamedow Monako Knýazlygynyň Şazadasy Albert II-a we ýurduň halkyna Türkmenistan bilen Monako Knýazlygynyň arasynda diplomatik gatnaşyklaryň ýola goýulmagynyň 10 ýyllygy mynasybetli gutlag iberdi. Bu barada Türkmenistanyň resmi metbugaty habar berdi.

Döwlet Baştutanynyň hatynda ikitaraplaýyn gatnaşyklaryň birek-birege hormat goýmak, deňhukuklylyk we ynanyşmak ýörelgelerine esaslanýandygy bellenip, Türkmenistanyň bu hyzmatdaşlygy geljekde hem iki halkyň bähbidine giňeltmäge taýýardygy nygtaldy. Prezident Şazada Albert II-a berk jan saglyk we bagtyýarlyk, Monako halkyna bolsa ösüş we rowaçlyk arzuw etdi.

Belläp geçsek, 2025-nji ýylyň 20-nji ýanwarynda türkmen halkynyň Milli Lideri, Halk Maslahatynyň Başlygy Gurbanguly Berdimuhamedow Monako Knýazlygyna sapar edip, Şazada Albert II bilen duşuşypdy.