Paýtagtymyzyň Halkara howa menzilinden Owganystanyň ýertitremeden ejir çeken çagalaryna we ilatyna ynsanperwerlik ýükleri ugradyldy. Prezident Serdar Berdimuhamedowyň Buýrugyna laýyklykda, dokma, azyk, egin-eşik we durmuşda zerur bolan önümlerden ybarat kömek ýükleri Kabul şäherine ýetirildi. Bu barada Türkmenistanyň resmi metbugaty habar berdi.

Kömekleriň ugradylmagy türkmen halkynyň gadymdan gelýän mätäje goldaw bermek ýörelgesiniň häzirki wagtda hem dowam etdirilýändiginiň aýdyň subutnamasydyr. Bu ynsanperwerlik işleri Gurbanguly Berdimuhamedow adyndaky Howandarlyga mätäç çagalara hemaýat bermek boýunça gaznanyň adyndan amala aşyryldy.

Kabulda geçirilen kabul ediş dabarasynda çykyş edenler Türkmenistanyň ýolbaşçylaryna we halkyna minnetdarlyk bildirdiler. Bellenilişi ýaly, şeýle kömekler türkmen-owgan dost-doganlygyny has-da pugtalandyrýar, hoşniýetli goňşuçylyk gatnaşyklaryny täze derejä çykarmaga ýardam edýär.

Muhammetmyrat MÄMMEDOW,

Türkmenistanyň Daşary işler ministrliginiň
Halkara gatnaşyklary institutynyň talyby.