2025-nji ýylyň 6-njy oktýabrynda Türkmenistanyň ÝHHG-niň ýanyndaky wekiliýeti Finlýandiýanyň hem-de ÝHHG-niň Demokratik institutlar we adam hukuklary boýunça býurosy tarapyndan guralan Adam ölçegleri boýunça Warşawa maslahatyna gatnaşdy. Bu barada ýurdumyzyň Daşary işler ministrliginiň resmi saýtynda habar berildi.

Maslahata gatnaşygyň dowamynda Türkmenistanyň ÝHHG-niň ýanyndaky Hemişelik wekili Hemra Amannazarow çykyş edip, ýurdumyzyň ÝHHG we onuň degişli düzümleri bilen gatnaşyklaryna ygrarlydygyny tassyklady.

Çykyşda Türkmenistanyň adam hukuklaryny goramak, ynsanperwer syýasaty we jemgyýetde sosial integrasiýany ösdürmek ugurlarynda gazanan üstünlikleri bellenildi. Şeýle hem ýurdumyzyň ynsanperwerlik, deňlik we halkara hyzmatdaşlyk ýörelgelerine ygrarlydygy nygtaldy.

Şeýle mysallaryň biri hökmünde, Garaşsyzlygyň 34 ýyllygy mynasybetli Prezident Serdar Berdimuhamedowyň Permany bilen 2025-nji ýylyň 26-njy sentýabrynda günäsi geçilen 225 raýatyň esasy jeza çäresinden boşadylmagy görkezildi. Bu çözgüt ýurdumyzyň kazyýet ulgamynda ynsanperwerlik ýörelgesiniň üstünlikli durmuşa geçirilýändiginiň subutnamasydyr.

Mundan başga-da, Türkmenistanyň Prezidentiniň Karary esasynda 15 milletiň we 7 ýurduň wekili bolan 142 daşary ýurt raýatyna ýurdumyzda ýaşamak üçin ygtyýarnama berilendigi aýdylýar. Bu bolsa Türkmenistanda halkara gatnaşyklarynyň, ynsanperwer hem-de açyk syýasatyň üstünlikli ösdürilýändigini tassyklaýar.

Gülşirin GURBANOWA,

Türkmenistanyň Döwlet energetika institutynyň
mugallymy.