Aprel aýynyň üçünji ongünlüginde Türkmenistanyň wekiliýeti Azerbaýjanyň paýtagty Baku şäherinde geçirilen “Almaty prosesiniň” üçünji ministrler derejesindäki duşuşygyna gatnaşdy. Bu barada Türkmenistanyň Daşary işler ministrliginiň web-saýty habar berdi.

Maslahata “Almaty prosesine” gatnaşýan ýurtlaryň – Azerbaýjan, Türkiýe, Gazagystan, Gyrgyzystan we Täjigistan – resmi wekilleri, şeýle hem synçy hökmünde Eýran, Italiýa, Pakistan döwletleriniň hem-de Türki döwletler guramasynyň, Halkara migrasiýa guramasynyň we BMG-niň Bosgunlar baradaky Ýokary Komissarlygynyň wekilleri gatnaşdylar.

Duşuşygyň dowamynda gatnaşyjylar ýurtlaryň arasyndaky hyzmatdaşlygyň pugtalandyrylmagy, migrasiýa bilen bagly meseleleriň netijeli dolandyrylmagy boýunça tejribeleri paýlaşmak we maglumat alyşmak ýaly mowzuklary giňden ara alyp maslahatlaşdylar.

Forumda çykyş edenler migrasiýa we bosgunlary goramak boýunça sebitleýin hyzmatdaşlygyň giňeldilmeginiň zerurdygyny nygtap, bu ugurda milli we sebitleýin derejesinde okuwlar hem-de maglumat alyş-çalşyklarynyň kämilleşdirilmelidigini bellediler.

Maslahatyň jeminde Azerbaýjan Respublikasynyň ýolbaşçylyk eden iki ýylynyň netijelerine bagyşlanan “Baku Jarnamasy” kabul edildi.