2026-njy ýylyň 29-njy ýanwarynda Aşgabat şäherinde Türkmenistanyň Daşary işler ministriniň orunbasary Ahmet Gurbanow bilen Russiýa Federasiýasynyň Daşary işler ministriniň orunbasary Mihail Galuziniň gatnaşmagynda türkmen-rus syýasy geňeşmeleriniň nobatdaky tapgyry geçirildi. Bu barada Türkmenistanyň DIM-niň web-saýtynda habar berildi.

Geňeşmeleriň dowamynda ikitaraplaýyn gatnaşyklaryň ösüş ugurlary boýunça giňişleýin pikir alyşmalar boldy. Taraplar dostlukly we ynanyşykly häsiýete eýe bolan strategik hyzmatdaşlygyň yzygiderli ösdürilýändigini bellediler.

Şeýle-de, hyzmatdaşlygyň diňe ikitaraplaýyn däl-de, köptaraplaýyn görnüşde hem üstünlikli alnyp barylýandygy kanagatlanma bilen nygtaldy. Bu babatda BMG-niň we GDA-nyň çäklerindäki hyzmatdaşlyga, şeýle hem «Merkezi Aziýa – Russiýa» formatynyň ähmiýetine aýratyn üns berildi.

Diplomatlar 2025–2026-njy ýyllar üçin baglaşylan Hyzmatdaşlyk maksatnamasynyň çäginde iki ýurduň daşary syýasat edaralarynyň arasynda dialogy has-da işjeňleşdirmäge taýýardygyny tassykladylar. Şeýle-de, sebit howpsuzlygy we durnuklylygy bilen bagly meseleler ara alnyp maslahatlaşyldy.

Annamuhammet Seýitnyýazow,

Halkara senagatçylar we telekeçiler
uniwersitetiniň talyby.