Dil arassalygy – diliň tebigy gurluşynyň, söz baýlygynyň we milli aýratynlyklarynyň goralmagydyr. Türkmen diliniň arassalygyny saklamak diňe döwlet derejesindäki çäreler bilen çäklenmän, her bir adamyň gündelik dil ulanyşyna baglydyr. Sebäbi diliň esasy ýaşaýan ýeri halkyň aňy we gündelik gepleşigidir.

Soňky ýyllarda daşary ýurt dillerinden gelýän sözleriň ýerliksiz ulanylmagy dil arassalygyna howp döredýär. Elbetde, halkara gatnaşyklarynyň giňelmegi bilen käbir terminleriň alynmagy tebigy ýagdaýdyr. Emma bu ýagdaý milli sözleriň unudylmagyna ýa-da dil gurluşynyň bozulmagyna getirmeli däldir.

Her bir dili göteriji adam öz sözleýşine jogapkärdir. Arassa, manyly we edebi dili ulanmak medeniýetiň alamatydyr. Mekdeplerde, ýokary okuw jaýlarynda, metbugatda we jemgyýetçilik ýerlerinde diliň arassalygyna üns bermek ýaş nesilde dil duýgusyny terbiýeleýär.

Dil arassalygyna bolan garaýyş adamyň umumy medeni derejesini hem görkezýär. Ene diline hormat goýýan adam onuň söz baýlygyny öwrenmäge, ýazuw we sözleýiş kadalaryny berjaý etmäge çalyşýar. Şeýle garaýyş jemgyýetde umumy dil medeniýetiniň kemala gelmegine şert döredýär.

Gülnar BERKELIÝEWA,

Türkmenistanyň Döwlet energetika
institutynyň mugallymy.