Aşgabat şäher medeniýet müdirliginiň Merkezleşdirilen kitaphanalar ulgamynyň Ýeňiş kitaphana şahamçasynda Türkmenistanyň Garaşsyzlygynyň 35 ýyllygyna bagyşlanan «Mukaddes Garaşsyzlyk – asyrlaryň hasyl bolan arzuwy» atly kitap sergisi we wagyz-nesihat çäresi geçirildi.

Çäräniň esasy mazmunynda taryhy öwrenmegiň we geçmişde gazanylan tejribeleri nesilden-nesle ýetirmegiň ähmiýeti öňe çykaryldy. Kitap sergisinde Türkmenistanyň taryhyny, milli gymmatlyklaryny we Garaşsyzlyk ýyllarynda gazanylan üstünlikleri beýan edýän neşirler görkezildi.

Çykyşlarda ýurduň ösüş ýoluna düşünmekde taryhy maglumatlaryň we milli mirasy öwrenmegiň möhüm ähmiýete eýedigi bellenildi. Şeýle hem Garaşsyz Türkmenistanyň ösüşi, milli ykdysadyýetiň kuwwatlanmagy we halkara giňişligindäki orny barada maglumatlar berildi.

Taryhy eserleriň we kitaplaryň giňden öwrenilmegi ýaş nesliň geçmişe bolan düşünjesini baýlaşdyrmak, milli gymmatlyklara hormat goýmak hem-de taryhy wakalara dogry baha bermek üçin möhüm serişdeleriň biri hökmünde görkezildi.

Çäräniň geçirilendigi barada Türkmenistanyň Medeniýet ministrliginiň resmi web sahypasynda habar berilýär.

Aýbibi ORAZDURDYÝEW,
Türkmenistanyň Döwlet medeniýet institutynyň
Kitaphanaçylyk fakultetiniň 3-nji ýyl talyby.