Ata-babalarymyzyň türkmen topragynda ösdürip ýetişdiren şirinden-şeker nygmaty gawunyň adam saglygyna peýdaly taraplary örän köpdür. Gawun – bereketli türkmen topragynyň behişdi nygmatlarynyň biridir. Şonuň üçin tagamyna taý tapylmajak bu ajaýyp şirin – şeker nygmaty halkymyzyň milli baýlygy, halal mirasy we bakjasynyň bezegi, buýsanjy hasaplanylýar.

Tejen etrabynyň daýhan birleşikleriniň çäklerinde gök-bakja önümlerini ösdürip, ýylyň-ýyllyna gawundyr garpyzyň bol hasylyny ýetişdirýän ekerançylar az däl. “Türkmenistan – parahatçylygyň we ynanyşmagyň watany” ýylynda hem Tejenli babadaýhanlarymyz kärende ýerlerinde gawunyň halkymyz tarapyndan aýratyn uly isleg bildirilýän waharman, gülaby, zamça ýaly görnüşlerini, garpyzyň bolsa astrahan, golland ýaly görnüşlerini ýetişdirýärler.

Şu günlerde ýetişdirilen gök-bakja önümlerini ýygnamak işleri gyzgalaňly dowam edýär. Daýhanlarymyzyň bereketli toprakdan alýan hasylynyň ýylsaýyn artýandygy has-da guwandyrýar.  Şu ýyl hem Tejenli daýhanlarymyz gök-bakja önümleriniň bol hasylyny ýetişdiripdirler. Sahawatly toprakdan bereket tapýan, şeýle bakjaçy kärendeçileriň çekýän yhlasly zähmeti netijesinde öndürilýän bakja önümleri saçagmyzyň bezegine öwrüler.