Sarahs etrap merkezinde ýerleşýän seýilbagda Çagalary goramagyň halkara güni mynasybetli etrabyň mekdebe çenli çagalar edaralarynda terbiýelenýän körpeleriň, bilim işgärleriniň, çagalaryň ata-eneleriniň gatnaşmagynda şowhun-şagalaňa beslenen aýdym-sazly dabara geçirildi. Dabarada çykyş edenler Çagalary goramagyň halkara güni mynasybetli ol ýere ýygnanan körpeleri gyzgyn gutladylar hem-de iň oňat arzuwlaryny beýan etdiler.

Dabarada çagalar baglaryndan gelen körpeler ata Watanymyzy, Berkarar döwletiň täze eýýamynyň Galkynyşy döwrüni, bagtyýar çagalygy, Gahryman Arkadagymyzy we Arkadagly Serdarymyzy wasp edýän aýdymlary ýerine ýetirdiler, goşgulary okadylar. Dabaranyň dowamynda körpeler türkmen milli oýunlary boýunça bäsleşdiler. Soňra baýramçylyk mynasybetli körpelere etrabyň jemgyýetçilik guramalarynyň sowgatlary gowşuryldy.