2025-nji ýylyň «Halkara parahatçylyk we ynanyşmak ýyly» şygaryna beslenmegi saýlap alan milli ösüş ýolumyzyň döredijilikli dowam etdirilýändiginiň aýdyň şöhlelenmesi bolup, kalbymyzy galkyndyrdy, jemgyýetimiziň ähli ulgamyny gurşap alan döredijilikli zähmete täze ylham berdi. Bu gün mähriban Watanymyz dünýä giňişliginde oňyn Bitaraplygyň, parahatçylygyň, abadançylygyň, jemgyýetde özara ynanyşmagyň, agzybirligiň dabaralanýan mekany hökmünde tanalýar. BMG-niň Baş Assambleýasy tarapyndan Türkmenistanyň başlangyjy esasynda «2025-nji ýyl — Halkara parahatçylyk we ynanyşmak ýyly» diýlip yglan edildi.

Türkmenistanyň oňyn başlangyçlarynyň halkara kadanamalar derejesinde öz beýanyny tapmagy adamzat ösüşiniň möhüm şerti bolan parahatçylygyň, hoşniýetli gatnaşyklaryň, ynanyşmak bilen dialoglara girip, dünýäniň öňünde duran derwaýys meseleleri çözmek ugrunda tagallalary birleşdirmegiň has-da giňden dabaralanmagyna goşýan mynasyp goşandygyny şöhlelendirýär. Hormatly Prezidentimiz Serdar Berdimuhamedowyň 2025-nji ýylyň 3-nji ýanwarynda sanly ulgam arkaly geçiren Hökümet mejlisiniň barşynda gol çeken Permany esasynda 2025-nji ýylyň «Halkara parahatçylyk we ynanyşmak ýyly» diýlip yglan edilmegi hem-de Türkmenistanyň hemişelik Bitaraplygynyň 30 ýyllygy mynasybetli çäreleri ýokary derejede geçirmek boýunça guramaçylyk döwlet toparynyň döredilip, onuň düzüminiň tassyklanylmagy bilen, täze menzillere badalga berildi.

Adamyň adam bilen, halkyň halk bilen, döwletiň döwlet bilen dost-dogan bolup, biri-birine ynanyp, deň hukuklardan peýdalanyp, hyzmatdaşlyk etmegi baradaky ýörelgeler köp müňýyllyk taryhymyzyň dowamynda ata-babalarymyz tarapyndan döredilen, kämilleşdirilen ýörelgelerdir. Häzirki döwürde bu ýörelgeler Gahryman Arkadagymyzyň, Arkadagly Gahryman Serdarymyzyň parasaty bilen döwlet syýasatynyň özenine siňendir we dünýä üçin hem örän ähmiýetlidir. Munuň özi döwletleriň arasynda gatnaşyklary kämil ýola goýmaga, sebitde we dünýäde durnuklylygy saklamaga, hyzmatdaşlygy, ösüşi üpjün etmäge ýardam berýän gymmatly syýasy tejribä öwrüldi.

Goý, il-ýurdumyzyň, tutuş dünýäniň parahatçylygy, durnukly ösüşi üçin uly tagallalary edýän Gahryman Arkadagymyzyň, Arkadagly Gahryman Serdarymyzyň janlary sag, ömürleri uzak bolup, umumadamzat bähbitli tutumlary elmydama rowaçlyklara beslensin! 

Jennet ILAMANOWA,

Myrat Garryýew adyndaky Türkmenistanyň
Döwlet lukmançylyk uniwersitetiniň
Psihiatriýa, narkologiýa we medisina
psihologiýasy kafedrasynyň mugallymy.