Häzirki wagtda döwrüň ösmegi bilen, dürli hyzmatlar, dürli önümçilik bilen meşgullanýan kompaniýalaryň, kärhanalaryň sany hem barha artýar. Islendik kompaniýa ýa-da kärhana öz önümleriniň giňden tanalmagy üçin dürli haryt nyşanlary, belgileri oýlap tapmak bilen, alyp barýan işini takyk görkezýän haryt nyşanyny döredip, ony kämilleşdirýär. Şeýle dünýäbelli brendler, meşhur haryt nyşanlary hakynda durup geçmek her birimiz üçin täsirli bolsa gerek: 

Nike. Köpümize mälim bolan bu haryt nyşanynyň manysy «swoosh» («bellik») bolup, ilkibaşda kompaniýa üçin bu nyşany satyn almak bary-ýogy 35 dollara düşüpdir. Nyşanyň awtory Karolaýna Dewidson hasaplanýar. «Swoosh» sözi «jürlewük» diýen manyny berýär. «Swoosh» nyşany onuň awtorynyň döredijiliginiň ilkinji üstünlikli işi bolup, oňa soňlugy bilen köp girdeji gazanmaga ýol açdy.

Apple. Häzirki wagtda has hem meşhurlygy artan «Apple» nyşanyny bilmeýänimiz ýok bolsa gerek. Bu haryt nyşanyny döreden kompaniýany esaslandyryjylaryň biri bolan Ronald Weýn hasaplanýar. 1998-nji ýyla çenli «Apple»-iň haryt nyşany älemgoşar reňkdäki dişlenen almanyň şekili boldy. Wagtyň geçmegi bilen «Apple» nyşany öz reňkini, göwrümini we çyzgysyny yzygiderli üýtgedip geldi. Häzirki wagtda bize mälim bolan, dişlenen adaty almanyň şekili 2015-nji ýylda döredildi.

Coca-Cola. Bu meşhur içginiň haryt nyşany ilkinji gezek 1893-nji ýylda döredilip, onuň ýazgysy kompaniýanyň ady bolup, elde gytaklaýyn görnüşde ýazylana çalymdaş bolupdyr. Bu nyşanyň awtory Frenk Robinson hasaplanylýar. Haryt nyşany dürli ýyllarda ençeme gezek üýtgedilip, 1980-nji ýylda «Coke» görnüşde atlandyrylyp, soňra onuň ýazylyş şekili ýene üýtgedildi. Häzirki «Coca Cola» brendiniň nyşany ilkinji şekiline meňzedilip, onuň öňküsinden tapawudy ýazgynyň gyzyl reňkde bolmagydyr. 

Lacoste. Krokodiliň şekilindäki bu haryt nyşany 1933-nji ýylda döredilip, ony esaslandyryjy Žan Rene Lakoste bolupdyr. Bu haryt nyşanyň awtory şol bir wagtda kompaniýanyň hem esaslandyryjysy bolup, ol şol döwrüň tanymal tennisçisi hasaplanypdyr. Şol wagt bu brendi «Alligator» ady bilen atlandyrypdyrlar. 

Lamborghini. Häzirki wagtda dünýä ýüzünde giňden tanalýan bu brend ilkibaşda traktor öndüripdir. Ony esaslandyryjy Ferruçço Lamborgini bolupdyr. Bu brendiň haryt nyşanynda hüjüm etmäge taýýar öküzi görmek bolýar. Munuň sebäbi-de ony esaslandyryjy F.Lamborgini öküz söweşleriniň muşdagy bolupdyr. Ol bu şekili çydamlylygyň alamaty hasaplapdyr. Häzirki wagtda bu kompaniýa gymmatbahaly super awtoulaglary bilen dünýä ýüzünde giňden tanalýar.

Ýakup MÄMMEDOW,

Türkmen oba hojalyk institutynyň talyby.