Gojaman taryhyň sahypalaryna ser salsaň, kuwwatly türkmen döwletiniň, asmana gol bulaýan kaşaň-kaşaň ymaratlary, bagy-bossana bürelip oturan şäherleri gurandyklaryny görmek bolýar. Emma, wagt geçip heňňam üýtgäp dur. Şeýle bolsa-da, ata-babalarymyzyň gaýraty bilen döredilen bu ajaýyp sungatlar, beýik-beýik ymaratlar ýer ýüzünden ýitip gidibermändir. Ene ýeriň gatlaklaryndan olaryň galyndylary tapylyp dur. Şol gymmatlyklary bir ýere jemläp, aýawly saklap, nesilden-nesle geçirmek üçin uly muzeýler döredilipdir.

Her bir taryhy gymmatlygy aýawly saklap, nesilden-nesle geçirip, olary has içgin öwrenmek üçin ýurdumyzyň ähli künjeklerinde muzeýler gurulyp ulanylmaga berildi. Türkmenistanyň Döwlet medeniýet merkeziniň Döwlet muzeýi, şekillendiriş sungaty muzeýi Milli haly muzeýi, Watan mukaddesligi muzeýi, Magtymguly pyragy muzeýi, Gökdepe muzeýi, şeýle hem welaýat merkezlerinde gurlan Taryhy we ülkäni öwreniş muzeýleri halkymyza taryhyň sahypalaryny açyp görkezýär.

         Muzeý gymmatlyklary biri-birinden täsirli. Gadymy döwürde ata-babalarymyzyň senetçilik sungatyny has ýokary derejä göterendiginiň şaýady bolýan keramika önümleri diýseň ajaýyp. Keramika gaplaryny öndürmek, baryp, gadymy Jeýtun, Änew, Altyndepe, Ulugdepe, Garadepe, Parzdepe, Namazgadepe ýaly gadymy medeniýetlerden gözbaşyny alyp gaýdýar. Ýurdumyzda gadymy Marguş, beýik Parfiýa döwletlerinde hem keramika önümlerini öndürmek ýokary derejede  ösüpdir. Orta asyrlarda türkmenler gaplaryň dürli görnüşlerini öndürip, olary syrçalamagy we nagyşlamagy başarypdyrlar.

         Uly mirashanany ýatladýan muzeýlerdäki gymmatlyklaryň her birirni synlamagyň üýtgeşik lezzeti bar. Olar ata-babalarymyzyň bize goýan milli gymmatlyklarydyr.