Agzybir türkmen ojagynda maşgala däplerini mynasyp dowam etdirmek, bilimli we edep-terbiýä ýugrulan sagdyn nesilleri kemala getirmek ýaly möhüm meseleler islendik döwürde hem üns merkezinde saklanypdyr. Berkarar döwletiň täze eýýamynyň Galkynyşy döwründe Gahryman Prezidentimiziň parasatly ýolbaşçylygynda ösüp gelýän ýaş nesilleri ýetişdirmekde dana pederlerimizden miras galan milli terbiýäniň özboluşlylygyny ýitirmän, terbiýeçilik işlerindäki däplerimizi mynasyp dowam etdirmäge we olary döwrümiziň talaplaryna laýyk ösdürmäge giň ýol açyldy.

Ynsany görke getirýän ajaýyp häsiýet bolan edep-terbiýesi çaganyň dünýä inen ilkinji ýyllaryndan kemala gelip başlaýar. Her bir ata-ene öz perzentlerini terbiýeli, päk ahlakly, halallyga ýugrulan, adamkärçilikli, zähmetsöýer, hakyky Watan ogly edip ýetişdirmek ugrunda gije-gündiz yhlas edýär. Parasatly pederlerimiziň ynsanperwerlige beslenen durmuş ýörelgeleridir pent-nesihatlary bu günki günde ýaşlarymyz üçin örän uly milli mekdep bolup durýar. Türkmen ýaşlarynyň ähli ugurlarda maşgala däplerine eýermekleri, öz ata-enelerinden nusga almak bilen, dogry ýoldan ýöremekleri jemgyýetiň sagdyn bolmagynda, ösen jemgyýetiň kemala gelmeginde esasy orun degişlidir.

Hormatly Preizdentimiziň: “Biz ata-enelerimiziň we maşgalanyň mukaddesligini arşa göterýän halkdyrys” diýen jaýdar jümleleri ýurdumyzda maşgala gymmatlyklaryna goýulýan aýratyn sarpanyň belent nyşanydyr.

Pälwan GURBANMYRADOW,
Türkmenistanyň Döwlet energetika
institutynyň talyby.