Dünýäniň hemme ýerinde bolşy ýaly, Angliýadaky musulmanlar hem Remezan bilen ýene bir gezek duşuşmagyň şatlygyny başdan geçirdiler. Paýtagt Londonyň meşhur köçelerinden biri bolan Piccadily Remezana taýýarlyk görmek üçin ýörite yşyklar bilen bezeldi.

Ýörite yşyklaryň ýakylyş çäresi şäheriň musulman häkiminiň gatnaşmagynda geçirildi. 30 müňden gowrak dürli reňkli yşyklar bilen köçäniň dürli ýerlerinde «Remezan gutly bolsun!», «Remezan mübärek bolsun!» ýaly ýazgylar ýazyldy.

Şäheriň musulman häkimi Londonyň West End şäherinde mübärek aýyň başlanmagyny bellemek üçin Remezan çyralaryny ilkinji gezek ýakandyklaryny aýtdy. Häkim pursatdan peýdalanyp Londondaky we dünýäniň ähli musulmanlaryna Remezan aýynyň şatlykly we bagtly geçmegini arzuw etdi.

Londonyň meşhur Piccadily köçesini bezemek baradaky pikir «Ramadan Lights UK» telekeçilik däl guramasy tarapyndan amala aşyryldy. Çykdaýjylar musulman guramalarynyň we jemgyýetçiligiň sadakalary bilen durmuşa geçirildi. 

Şamuhammet JUMAÝEW,

Türkmen döwlet binagärlik-gurluşyk
institutynyň talyby.