Düýn, 22-nji aprelde Aşgabat şäherindäki ýöriteleşdirilen 131-nji orta mekdepde II halkara matematika olimpiadasyna resmi ýagdaýda badalga berildi. Şu gün irden okuwçylar olimpiadanyň şahsy tapgyrynda öz ukyp-başarnyklaryny synagdan geçirdiler.

Olimpiada bilen bilelikde, wekiliýetleriň ýolbaşçylary bäsleşigiň geçirilýän mekdebinde okuw-terbiýeçilik işleriniň guralyşy bilen tanyşmaga mümkinçilik aldylar. Mundan başga-da, olar Türkmenistanyň Ylymlar akademiýasynyň Halkara ylmy-tehnologiýalar parkyna baryp gördüler.

Günüň ikinji ýarymynda olimpiadanyň gatnaşyjylary hem-de wekiliýetleriň ýolbaşçylary paýtagtymyzyň Türkmen halysynyň milli muzeýine we «Nusaý» medeni-taryhy ýadygärligine gezelenç etdiler​.