Berlindäki bir myhmanhananyň birinji gatynda ýerleşýän 16 metr uzynlygyndaky «Aqua Dom» atly ägirt uly akwarium 16-njy dekabrda ýerli wagt bilen 05:45-de ýaryldy. Netijede, myhmanhanadaky käbir zatlar bilen birlikde takmynan 1 million litr suw we akwariumdaky 1500-den gowrak balyk pytrap gitdi. Myhmanhanadaky köp zatlar weýran boldy we ulanyp bolmajak ýagdaýa geldi.

Wakada Berlin polisiýasy 2 adamyň ýüzleý ýaralanandygyny mälim etdi. Berliniň häkimi metbugata beren beýanatynda, äpet akwariumyň 1 sagat gijä galyp ýarylan halatynda adam pidalarynyň hem köp boljakdygyny aýtdy. Häzirki wagtda wakanyň bolan ýerinde polisiýa, ýangyn söndürijiler we gyssagly kömek toparlary iş alyp barýar.