Hytaýyň Heilongjiang welaýatynda durmuşa geçirilmegi meýilleşdirilýän ultra-tiz otly taslamasy häzirki wagtda bar bolan otly tizligini iki esse ýokarlandyrar. Täze dörediljek otlynyň sagatda 1000 km tizlige ýetmegi meýilleşdirilýär.

Ultra-tiz otly bilen ýerli syýahatçylygy janlandyrmak göz öňünde tutulýar. Otly  «maglew» ýagny magnit demir ýol aýratynlygyna eýe bolar. «Maglew» otlulary adaty otlylardan tapawutlylykda relslerde däl-de howada hereket edýär.

«Magnetic Levitation» sözünden gelip çykan «maglew» otlulary magnit arkaly göteriş otlusy hökmünde kesgitlenýär. Otly ýokary tizlige ýetmek üçin magnit göteriji güýçden peýdalanýar.

Ýokary tizlige ýetip bilýän «maglew» otlusynyň hereketi elektromagnitler arkaly amala aşyrylýar.

Otlyny herekete getirmek üçin relslerdäki elektromagnitleriň polýuslary üýtgedilýär. Bu üýtgeşmäniň netijesinde «maglew» otlusy ýokary tizlige ýetip bilýär.

Hytaýda işe başlajak ultra ýokary tizlikli otly wakuum transport turbasynda hereket eder.

Merjen HUDAÝBERDIÝEWA,

Türkmenistanyň inžener-tehniki we
ulag kommunikasiýalary
institutynyň mugallymy.