Gökdepe etrabynyň Galla önümleri kärhanasynda «Galla biziň baýlygymyzdyr!» ady bilen wagyz-nesihat duşuşygy geçirildi. Türkmenistanyň Agrar partiýasynyň etrap komitetiniň hem-de etrabyň beýleki jemgyýetçilik guramalarynyň guramagynda bolan duşuşyga agzalan kärhananyň işçi-hünärmenleri gatnaşdy.

Galla oragynyň öňüsyrasynda geçirilen duşuşykda guşgursak ak bugdaýyň ýurdumyzyň gymmatly baýlygydygy, halkymyzyň rysgalydygy hakda söz açylyp, Watanymyzda däneçiligi ösdürmek, ýylyň-ýylyna ak ekiniň bol hasylyny ýetişdirmek babatda edilýän tagallalaryň ähmiýeti bellenildi. Çykyşlarda öňde duran galla oragyny guramaçylykly alyp barmakda her bir adamyň goşandynyň möhümdigi aýratyn bellenip geçildi hem-de oňa gatnaşyjylara şonuň bilen bagly gymmatly öwüt-ündewler aýdyldy.