Berkarar döwletiň täze eýýamynyň Galkynyşy döwründe ýurdumyz ähli ugurlar babatda ösüşlere eýe bolýar. Milli ykdysadyýetimiziň okgunly ösýän möhüm ulgamy hökmünde ykrar edilen gurluşyk we senagat toplumy «Berkarar döwletiň täze eýýamynyň Galkynyşy: Türkmenistany 2022 — 2052-nji ýyllarda durmuş-ykdysady taýdan ösdürmegiň Milli maksatnamasyny» yzygiderli durmuşa geçirmekde wajyp orny eýeleýär. Diýarymyzyň ähli künjeklerinde ýokary amatlykly ýaşaýyş jaýlary, döwrebap mekdepler, çagalar baglary, saglygy goraýyş we sport maksatly desgalar, seýilgähler we beýleki köp sanly desgalar ulanmaga berilýär. Bularyň ählisi döwletimiziň ykdysady kuwwatynyň barha artýandygynyň aýdyň subutnamasydyr. Diýarymyzyň çar künjeginde amala aşyrylýan ägirt uly gurluşyklar halkymyzyň abadan we bagtyýar durmuşyny üpjün etmäge gönükdirilen durmuş ugurly döwlet syýasatynyň aýdyň netijesidir. Ak mermerli Aşgabat ýurdumyzyň kuwwatynyň artýandygynyň, Gahryman Arkadagymyzyň başyny başlan hem-de Arkadagly Serdarymyzyň dowam etdirýän özgertmeleriniň uly üstünliklere eýe bolýandygynyň nyşanydyr. Ýurdumyzyň baş şäheriniň ösdürilmegi, onuň düzüminiň kämilleşdirilmegi alnyp barylýan täzeçil şähergurluşyk syýasatynyň esasy ugurlarynyň biri bolup durýar. Ajaýyp binalar ak mermerli paýtagtymyz Aşgabadyň ajaýyp binagärlik keşbi bilen sazlaşykly utgaşyp, häzirki döwrüň özboluşly nyşanyna, amala aşyrylýan durmuş ugurly syýasatyň dabaralanmasyna öwrüldi. Bu durmuş maksatly taslamalar ýurdumyzyň baş şäheriniň çäkleriniň giňelýändigini hem-de onuň ýaşaýjylarynyň sanynyň artýandygyny nazara almak esasynda işlenip taýýarlanylýar. Häzirki wagtda Aşgabadyň bu künjeginde döwrebap ýol-ulag ulgamy, şäherliler üçin has oňaýly şertleri döretmek babatda inženerçilik-kommunikasiýa ulgamlarynyň tutuş toplumy döredilýär.

Hormatly Prezidentimiziň öňde goýan wezipelerine laýyklykda, ýurdumyzyň ähli künjeginde ägirt uly binagärlik toplumlary, oňaýly ýaşaýyş jaýlary, iň kämil, döwrebap tehnikalar bilen üpjün edilen iri önümçilik kärhanalary gurulýar. Olar häzirki taryhy eýýamyň döredijilik ruhunyň aýdyň beýanyna öwrüldi. Ahal welaýatynyň täze, döwrebap edara ediş merkezi bolan «Arkadag» şäheriniň ýokary depginde alnyp barylýan gurluşygy we bu giň gerimli taslamanyň ikinji tapgyrynyň durmuşa geçirilip başlanmagy hem aýratyn bellenmäge mynasypdyr. Bu «akylly» şäheriň innowasion taslamasy dünýäniň we milli binagärligiň, bezegiň, tehnologik üpjünçiligiň iň gowy ýörelgelerini özünde jemleýär. Şäher düzümi durmuş we beýleki maksatly desgalaryň toplumyny, şol sanda çagalar baglaryny, mekdepleri, beýleki ýöriteleşdirilen okuw mekdeplerini, saglygy goraýyş, medeniýet, söwda, hyzmatlar ulgamlarynyň edaralaryny, sport desgalaryny, edara binalaryny özüne birleşdirýär. Arkadagly Serdarymyzyň baştutanlygynda «Sagdyn jemgyýet sagdyn döwletiň esasydyr» diýen şygar astynda raýatlaryň saglygyny goramak we berkitmek, ýaş nesilleriň arasynda sagdyn durmuş ýörelgesini berkarar etmek boýunça dünýäniň öňdebaryjy enjamlary bilen üpjün edilen sebitdäki täze hassahanalar, saglyk merkezleri ilatyň saglygyny berkitmek babatda ýurdumyzyň esasy merkezlerine öwrülendir. Häzirki wagtda amala aşyrylýan ençeme beýleki gurluşyklar ýaly, bu taslamanyň durmuşa geçirilmeginiň hem ägirt uly kuwwata eýe bolan we geçen ýyllaryň dowamynda paýtagtymyzda, welaýatlarda gurluşyk işlerinde uly tejribe toplan hususy telekeçilere ynanylandygy hem aýratyn bellärliklidir. Şeýle döwletli, tutumly işleriň sakasynda duran Arkadagly Serdarymyza buýsanjymyz hem alkyşymyz egsilmezdir! 

Muhammetmyrat AŞYROW,

Türkmenistanyň Inžener-tehniki we 
ulag kommunikasiýalary 
institutynyň talyby.