Türkmenistanyň Prezidentiniň yglan eden “Halkara Parahatçylyk we Ynanyşmak​ ýylyna” hem-de ýurdumyzyň Hemişelik Bitaraplygyň 30 ýyllygyna bagyşlanan giň gerimli çäreler ýurdumyzda giňden dowam edýär. Bu uly şanly senäniň hormatyna ýurdumyzyň dürli künjeklerinde döwlet derejesindäki medeni çäreler guralyp, ýurdumyzyň döredijilik ulgamynda hem ýokary ruhubelentlik duýulýar.

Türkmenistanyň medeniýetini we sungatyny ösdürmekde alnyp barylýan işler netijesinde, ýaşlaryň aýdym-saz bilimi ýylyň-ýylyna ösdürilýär. Gahryman Arkadagymyzyň we Arkadagly Gahryman Serdarymyzyň başlangyçlary esasynda döredijilik ugry boýunça täze mümkinçilikler açylyp, ýurdumyzyň sazçylyk mekdeplerinde hem-de ýokary okuw jaýlarynda zehinli ýaşlara giň ýol açylýar.

Şu günler geçirilýän baýramçylyk çäreleriniň çäklerinde Maýa Kulyýewa adyndaky Türkmen milli konserwatoriýasynyň hem-de ýurdumyzyň ýörite sazçylyk we sungat mekdepleriniň talyplaryndan düzülen birleşen üflenip we kakylyp çalynýan saz gurallary orkestriniň “Bitaraplyk – parahatçylyk mukamy” atly konserti Magtymguly adyndaky Milli sazly drama teatrynda geçirildi.

Dabaranyň başynda türkmen kompozitory Röwşen Nepesowyň “Bitaraplyk” simfoniýasynyň III bölümi ýaňlandy. Şeýle hem halypa kompozitor Daňatar Hydyrowyň​ “Elwan güller” atly eseri, kompozitor Çary Nurymowyň​ “Çapyksuwaryň aýdymy” sada we belent ruhda ýerine ýetirildi.

Şondan soň Peru​ respublikasynyň kompozitory Billy​ Maýyň meşhur ýerine ýetiriji Imy​ Sumak üçin ýazylan “Goomba​ Boomba​” aýdymy talyp Munisa Hudaýbergenowa​ tarapyndan ýerine ýetirildi. Şeýle hem özbek kompozitory O​. Taşmatowyň​ täzeden işlän “Andijan​ polka” tansynda orkestr bilen birlikde kafedranyň​ mugallymy Sabirow​ Sarwar​ we talyp Ergeşow​ Söhbet çykyş etdiler.

Konsertiň dowamynda grek kompozitory Wangelisiň​ “Conquest​ of Paradise​” atly eseri hem ýerine ýetirildi. Hor bilen orkestriň sazlaşykly ýerine ýetiren bu eserinde dost-doganlygyň, parahatçylygyň we ruhubelentligiň belent owazy teatry doldurdy.

Dabaranyň dowamynda ýerine ýetirilen ähli eserlere mugallym Şirhan Batyrow dirižýorlyk etdi. Şeýle hem Türkmenistanyň at gazanan artistleri — Selbi Annadurdyýewa​, Babaguly​ Goşaýew​, Begenç Moşşyýew​, Döwran Gylyjow, Güljemal Taýlyýewa çeper çykyşlary bilen çykyş etdiler.

Konsertiň ahyrynda hor bilen orkestriň bilelikde ýerine ýetirýän dabaraly eseri tomaşaçylaryň gyzgyn elçarpyşmalaryna mynasyp boldy. Bu çykyş parahatçylykly diplomatiýanyň, döredijiligiň hem-de halklar dostlugynyň sungat arkaly beýany hökmünde aýratyn bellenildi.

Baýramçylyk konsertine taýýarlyk döwründe welaýatlaryň dürli künjeklerinden gelen talyplar bilen ýörite ussatlyk sapaklaryny uly tejribeli mugallymlar — dosent Berdinýaz​ Rejepmedow​, Türkmenistanyň at gazanan artisti Muhammetçary​ Annamyradow​, Ýazguly Babanyýazow​ hem-de uly mugallym Dürjemal​ Çaňlyýewa​ geçirdiler. Bu netijeli sapaklar ýaş sazandalaryň hünär kämilleşmegine, döredijilige bolan höwesiniň artmagyna we geljekki üstünlikleriniň berk binýadynyň tutulmagyna ýardam etdi.
 

Ogulsapar MUHAMETOWA,

Türkmen döwlet medeniýet we
sungat mekdebiniň mugallymy.