Türkmenistan dünýäniň syýasy kartasynda parahatçylyk söýüjiligi, ynanyşmagy hem-de açyk syýasaty bilen tanalýar. Bu üstünlikleriň merkezinde bolsa ýurdumyzyň halkara derejesinde giňden ykrar edilen Bitaraplyk syýasaty durýar. Parahatçylyk we özara düşünişmek ýörelgesine daýanýan bu syýasat diňe bir ýurduň halkara abraýyny pugtalandyrman, eýsem dünýäniň dürli ýurtlaryna-da ynsanperwerlik göreldesini görkezýär.

Şu ýylyň 12-nji dekabrynda Aşgabatda geçiriljek halkara forum hem Türkmenistanyň Bitaraplygynyň many-mazmuny bilen doly utgaşýar. Şeýle hem bu çäre «Halkara parahatçylyk we ynanyşmak ýyly» bilen gabat gelip, ýurdumyzyň dünýäniň dürli künjeklerinden gatnaşýan wekiller bilen umumy ýörelgeleri taýýarlamakda möhüm meýdança hökmünde çykyş etjekdigini görkezýär.

Soňky ýyllarda ýurdumyz energiýa howpsuzlygy, ekologik meseleler, durnukly ulag ulgamy ýaly möhüm ugurlarda halkara tagallalaryna işjeň goşuldy. Bu başlangyçlaryň ählisi Bitaraplygyň diňe bir söz däl-de, dünýäni durnukly ösüşe alyp barýan anyk işleriň jemlenmesi bolup durýandygyny görkezýär.

Şonuň üçin-de 12-nji dekabrdaky halkara forum diňe bir baýramçylyk çäresi däl — ol türkmen Bitaraplygynyň dünýäde barha giňden kabul edilýändiginiň, onuň parahatçylykly göreldesiniň dünýä ýurtlaryny birleşdirýändiginiň nobatdaky subutnamasy bolar. Bu forumda dünýä ýurtlarynyň wekilleri Türkmenistanyň öňe sürýän ynanyşmak we parahatçylyk ýörelgeleriniň ähmiýetini ýene bir gezek şaýady bolarlar.

Mähri Öwezowa,

S.A.Nyýazow adyndaky Türkmen
oba hojalyk uniwersitetiniň mugallymy.