Türkmenistanyň Magtymguly adyndaky Ýaşlar guramasynyň Sarahs etrap Geňeşiniň, Sarahs etrap Bilim bölüminiň, Sarahs etrabynyň çagalar we ýetginjekler döredijilik öýiniň , Sarahs etrabynyň Oraz Salyr adyndaky çagalar sungat mekdebiniň bilelikde gurnamaklarynda Baky Bitaraplygymyzyň 25 ýyllygyna bagyşlanyp etrabyň Medeniýet öýünde ýaş zehinleriň arasynda “Bitaraplyk Baky bagtymyz” ady bilen sergi bäsleşigi guraldy. Sergi bäsleşigine gatnaşanlar heýkeltaraşlyk sungaty, nakgaşçylyk sungaty şeýle-de milli däp-dessurlarymyzy wasp edýän el işleri boýunça ýerine ýetiren işlerini erjellik bilen görkezdiler. Bäsleşige gatnaşan okuwçylar öz ýerine ýetiren işleri boýunça giňişleýin gürrüň berdiler. Bäsleşikde esasan hem Baky Bitaraplygymyzyň 25 ýyllygyna bagyşlanan işler bolup, mundan başgada sergide türkmen halkymyzyň geçmiş taryhy, milli mirasymyz, ata-babalarymyzda, ene-mamalarymyzda miras galan milliligimiz, Berkarar döwletimiziň bagtyýarlyk döwrüniň waspy giňden beýan edilen. Geçirilen sergi bäsleşiginde nakgaşçylyk sungaty boýunça etrabyň “Oraz Salyr” adyndaky çagalar sungat mekdebiniň okuwçysy Berdimyradowa Aýsenem, milli mirasymyzy wasp edýän el işleri boýunça  etrabyň çagalar we ýetginjekler öýüniň okuwçysy Bagtyýarowa Mähri,  heýkeltaraşlyk sungaty boýunça bolsa çagalar we ýetginjekler döredijilik öýiniň okuwçysy Dosmämmedow Dosmämmet dagylar tapawutlanyp ýeňiji boldular. Ýeňiji bolan okuwçy ýaşlara Hormat hatlary dabaraly gowşuryldy.