Seni nämüçin söýýärkäm?!
Ýigrenip bilmesem näme?!
Dünýämde durkuň duýýarkam,
Aýralyk bilmesem näme?!

Ýakman ýüregmiň parasyn,
Ýar gelip halym sorasyn!
Ýagşy-ýamanyň arasyn
Saýgaryp bilmesem näme?!

Barlygyňa şükür hälem,
Kalbym islese-de näler,
Söýgi soraglap giň älem
Aýlanyp bilmesem näme?!

Doňup galan görejimde,
Heder etdim şol rejämden,
Gapyrgalyk derejämden
Saýlanyp bilmesem näme?!

Ýyldyz bolsam asmanyňda,
Aýdym bolsam dessanyňda,
Bilbil bolsaň bossanymda,
Saýradyp bilmesem näme?!

Ne-hä sag, ne-de däli men,
Seri dumandan doly men.
Günde düýş görýän ýaly men,
Aýňalyp bilmesem näme?!

Unudyp hasrat, gaýgymy,
Belentde saklap söýgimi,
Ýüregme üýşen duýgymy
Ýaýradyp bilmesem näme?!