2025-nji ýylyň 5–8-nji awgusty aralygynda Türkmenistanyň “Awaza” milli syýahatçylyk zolagynda Birleşen Milletler Guramasynyň Baş Assambleýasynyň karary esasynda Deňze çykalgasy bolmadyk ösüp barýan döwletler boýunça üçünji halkara maslahat geçiriler. Bu barada Türkmenistanyň Söwda-senagat edarasy habar berdi.

Habarda aýdylmagyna görä, bu foruma BMG-niň agza döwletlerinden, halkara maliýe guramalaryndan we sebit birleşiklerinden ýokary derejeli wekiller gatnaşar. Şeýle-de halkara bilermenleriň, alym-bilermenleriň we işewür toparlaryň gatnaşmagynda tematik maslahatlaryň, tegelek stollaryň hem-de ikitaraplaýyn duşuşyklaryň geçirilmegine garaşylýar.

Maslahatyň baş maksady deňze çykalgasy bolmadyk ösüp barýan ýurtlaryň ykdysady mümkinçiliklerini ýokarlandyrmak, ulag-logistika infrastrukturasyny kämilleşdirmek, halkara we sebitara söwda gatnaşyklaryny giňeltmek hem-de bu ýurtlaryň dünýä ykdysady ulgamyna has doly goşulyşmagyna ýardam bermekden ybaratdyr.

Şeýle hem forumyň dowamynda ulag geçelgeleri, serhetara söwda, energiýa üpjünçiligi, azyk howpsuzlygy, sanly ykdysadyýet we howanyň üýtgemegi ýaly möhüm meseleleriň giň gerimde ara alnyp maslahatlaşyljakdygy bellenilýär.

Bu halkara çäräniň geçirilmegi Türkmenistanyň diňe bir sebitleýin hyzmatdaşlygyň däl, eýsem dünýä derejesindäki möhüm meseleleriň çözgüdine hem işjeň gatnaşýandygynyň aýdyň subutnamasydyr.

Ýazbibi AKYMOWA,

Türkmenistanyň Döwlet energetika institutynyň
mugallymy.