2025-nji ýylyň 5–8-nji awgusty aralygynda Awazada geçiriljek Birleşen Milletler Guramasynyň Deňze çykalgasy bolmadyk ösüp barýan ýurtlar boýunça üçünji maslahatynyň (LLDC3) çäklerinde Raýat jemgyýeti forumy öz işini alyp barar. Bu forum dünýäniň dürli künjeklerinden gelen raýat jemgyýeti wekillerine BMG ýolbaşçylary, döwlet ýolbaşçylary we beýleki gyzyklanma bildirýän taraplar bilen tejribe alyşmaga giň mümkinçilik döreder.

Deňze çykalgasy bolmadyk ösüp barýan ýurtlar (LLDC) köp ýyllaryň dowamynda geografiki ýerleşişi, ulag çykdajylarynyň ýokarylygy we halkara bazarlara elýeterliligiň çäklilikleri ýaly kynçylyklara sezewar boldular. Pandemiýa döwrüniň yz ýany bu kynçylyklar has-da çylşyrymlaşdy. Şeýle ýagdaýda, LLDC ýurtlarynyň durnukly ösüşe ýetmek ugrunda täze strategiýalara we hyzmatdaşlyga mätäçdigi öňe çykýar.

Sanly ykdysadyýetiň we innowasion tehnologiýalaryň ösýän häzirki döwründe LLDC ýurtlary üçin täze mümkinçilikleriň gapysy açylýar. Sanlylaşdyrma diňe bir fiziki päsgelçilikleri ýeňip geçmäge kömek etmän, eýsem, ykdysadyýetiň ösüşini çaltlaşdyrmak üçin hem güýçli gural bolup hyzmat edýär.

Forumda raýat jemgyýeti aktiwistleriniň we guramalarynyň orny aýratyn nygtalýar. Olar diňe bir ýerli meseleleri gündeme getirmek bilen çäklenmän, eýsem halkara derejesinde hem ösüşe degişli syýasy gepleşiklere gatnaşmaga mümkinçilik alýarlar. Raýat jemgyýeti guramalarynyň täze pikirleri, tejribeleri we döredijilikli çemeleşmeleri LLDC ýurtlarynyň ösüş maksatnamalaryna uly itergi berip biler.

Şeýle-de, daşarky goldawa (ODA, FDI, grantlar, karzlar) ýokary derejede garaşly bolan LLDC ýurtlarynyň maliýe durnuklylygyny saklamak ugrunda strategiýa taýdan täze çemeleşmelere mätäçdigi bellendi. Forumyň dowamynda bu meseleler hem giňişleýin ara alnyp maslahatlaşylar.

Awazada geçiriljek bu forum diňe bir LLDC ýurtlarynyň ösüş ýolundaky kynçylyklaryna däl, eýsem, olaryň mümkinçiligine hem ünsi jemleýär. Raýat jemgyýeti wekilleriniň gatnaşmagy bilen bu forum halkara hyzmatdaşlygyň täze tapgyryna ýol açar diýip garaşylýar.

Has giňişleýin maglumat üçin: lldc3.gov.tm

Gurbanberdi Öwlýagulyýew

Turkmenistanyň Dowlet energetika institutynyň mugallymy