Magtymguly adyndaky Ýaşlar guramasynyň Merkezi geňeşiniň ýanynda çykarylýan «Arkadagly Ýaşlar» žurnalynyň awgust sany çapdan çykdy. Bu barada Türkmenistanyň resmi metbugaty habar berdi. Däp bolşy ýaly, neşirde Garaşsyz döwletiň ösüşinde, hormatly belent sepgitlere ýetilmeginde ýaşlaryň tutýan orny we goşýan goşandy beýan edilýär.

Sanyň ilkinji sahypalarynda Gahryman Arkadagymyzyň başlyklyk etmeginde geçirilen Halk Maslahatynyň Prezidiumynyň mejlisinde kabul edilen Kararlar barada giňişleýin makala ýerleşdirilipdir.

Hazaryň kenarynda geçen Deňze çykalgasy bolmadyk ösüp barýan ýurtlaryň üçünji maslahatynyň çäklerindäki halkara Ýaşlar forumy barada taýýarlanan «Ýaşlar forumy: röwşen geljegiň täze gözýetimi» atly makalada forumyň ýokary ruhubelentlikde geçendigi aýratyn nygtalýar. Awazada geçirilen bu giň möçberli çäre hakyndaky maglumatlaryň käbirleri iňlis dilinde hem okyjylara ýetirilýär.

«KIDS EXPO: ähli zat çagalar üçin» atly halkara sergi-ýarmarkasy baradaky makalada bagtyýar çagalyk hakda gürrüň berilýär. Şeýle hem rus dilinde taýýarlanan «Ylym we tehnologiýa täzelikleri» atly makalada häzirki döwrüň ösen tehnologiýalary hakynda täsirli maglumatlar ýerleşdirilipdir. Türkmenistanyň Gahrymany, şahyr Gözel Şagulyýewanyň doglan gününiň 85 ýyllygyna bagyşlanan makala onuň döredijilik mirasyna seredýär. Mundan başga-da, Modell-Weil teoremasy baradaky iňlis dilinde çap edilen makala hem okyjylaryň ünsüni çekýär.

Žurnalyň soňky sahypalarynda aýlyk täleýnama, şeýle hem «Arkadagly Ýaşlar» žurnalynyň döredilmeginiň 3 ýyllygy mynasybetli yglan edilen bäsleşigiň düzgünnamasy ýerleşdirilipdir. Elektron neşirde bolsa «Ýaş waspçy» bäsleşiginiň täze ýeňijisi baradaky maglumat bilen jemlenýär.

Mälikberdi Çerkezow,

Türkmenistanyň Daşary işler ministrliginiň
Halkara gatnaşyklary institutynyň talyby.