2025-nji ýylyň 29-njy dekabrynda Türkmenistanyň Aktau şäherindäki Konsullygynyň binasynda Türkmenistanyň Prezidenti Serdar Berdimuhamedowyň «Türkmenistanyň Bitaraplygy – parahatçylygyň we ynanyşmagyň aýdyň ýoly» atly kitabynyň tanyşdyrylyş dabarasy geçirildi. Bu barada Türkmenistanyň Daşary işler ministrliginiň resmi web-saýtynda habar berildi.

Dabara Ş. Ýesenow adyndaky Hazar deňzi döwlet tehnologiýalar we inžiniring uniwersitetiniň talyplary, şeýle hem türkmen diasporasynyň wekilleri gatnaşdylar.

Çäräniň dowamynda täze neşiriň Türkmenistanyň ösüş ýolunyň esasy tapgyrlaryna düşünmekde, şeýle-de häzirki halkara şertlerinde hemişelik bitaraplyk syýasatynyň mazmunyny giňden we çuňňur açyp görkezmekde möhüm ähmiýete eýedigi bellenildi. Kitapda bitaraplyk ýyllarynda ýurdumyzyň milli däpleri innowasion ösüş bilen sazlaşykly utgaşdyryp, içki durnuklylygyny saklamak bilen dünýä bilen açyk hyzmatdaşlyga gönükdirilen, depginli ösýän döwlete öwrülendigi nygtalýar. Şeýle-de ykdysady, ulag, medeni we diplomatik ugurlarda gazanylan üstünlikleriň parahatçylyk söýüjilikli döwlet syýasatynyň yzygiderli durmuşa geçirilmeginiň netijesidigine aýratyn üns çekildi.

Çykyş edenler bu kitabyň Türkmenistanyň milli özboluşlylygynyň aýrylmaz bölegi bolup durýandygyny, şeýle-de parahatçylyk, dostluk we durnukly ösüş ýörelgelerine ygrarlylygyny alamatlandyrýan hemişelik bitaraplyk derejesiniň halkara derejesinde ykrar edilmeginiň 30 ýyllygyna bagyşlanyp çap edilmeginiň aýratyn ähmiýetiniň bardygyny bellediler.

Tanyşdyrylyş dabarasy tamamlanýan ýylyň möhüm jemgyýetçilik-syýasy wakalarynyň biri hökmünde bahalandyrylyp, kitapda beýan edilen bitaraplyk syýasaty baradaky garaýyşlaryň Türkmenistanyň häzirki döwri we geljegi üçin hem uly ähmiýete eýedigini tassyklandy.

Çäräniň jemlerinde gatnaşyjylar eserde beýan edilen pikirleri mundan beýläk-de giňişleýin ara alyp maslahatlaşmaga taýýardyklaryny beýan etdiler. Dabaranyň ahyrynda myhmanlara türkmen milli aşhanasynyň tagamlary hödür edildi.

Döwletgeldi BADAGLYÝEW,

Türkmenistanyň Döwlet energetika
institutynyň mugallymy.