Aşgabat şäheri Garaşsyz, hemişelik Bitarap Türkmenistanyň ak mermerli paýtagtydyr. Aşgabada «arzuwlaryň şäheri» diýlende, geljegiň maksatnamalary hakynda hem aýdyp bolar. Häzirki döwürde Aşgabadyň ösüşini diňe onuň şu günki kartasynda anyk görüp bilersiňiz.

2013-nji ýylyň 25-nji maýynda Aşgabat ak mermerli binalaryň has köp jemlenen şäheri hökmünde Ginnesiň rekordlar kitabyna girizildi we Türkmenitanyň Prezidentiniň degişli kararyna laýyklykda, 2013-nji ýyldan başlap, 25-nji maý – Aşgabat şäheriniň güni hökmünde bellenilip başlandy.  Hormatly Arkdagymyzyň başlangyjy esasynda her ýylyň 25-nji maýynda Aşgabat şäheriniň gününiň baýram edilmegi Berkarar döwletimiziň täze eýýamynyň Galkynyşy döwründe ýaýbaňlandyrylan hem-de Aşgabadyň keşbinde öz beýanyny tapan oňyn özgertmeleriň gerimini äşgär edýär.

Halkara hyzmatdaşlygy nukdaýnazaryndan Aşgabat ynsanperwerligiň, myhmansöýerligiň we ygtybarly hyzmatdaşlygyň mekanydyr. Hormatly Prezidentimiziň parasatly ýolbaşçylygynda Aşgabat halkymyzyň günbe-günden geljege tarap okgunly öňe barýan,  arzuwlarynyň hasyl bolan ak mermerli şäherine öwrülýär.

Bägül SAPARMYRADOWA,

Türkmenistanyň Daşary işler ministrliginiň
Halkara gatnaşyklary institutynyň talyby.