Ahal welaýatynyň çäginde täze 2023 – 2024-nji okuw ýyly mynasybetli jemi 62 sany mekdep bazary guraldy.

Ahal welaýat Alyjylar jemgyýetleriniň birleşigi tarapyndan welaýatyň çägindäki ak bazarlaryň 6-synyň, dükanlaryň 56-synyň ýanynda guralan mekdep bazarlary alyjylara giň gerimli hyzmatlaryny hödürleýär. Olarda hödürlenýän mekdep harytlarydyr okuw esbaplary köpgörnüşliligi we hiliniň ýokarydygy bilen ünsi çekýär. Alyjylara hödürlenýän harytlaryň aglaba görnüşi ýurdumyzda döwletiň garamagyndaky, şeýle-de hususy pudaga degişli kärhanalar tarapyndan öndürilen, dünýä bazarynda bäsdeşlige ukyply önümlerdir. Olaryň arasynda ýokary hilli okuw esbaplaryndan başga-da, okuwçy we sport egin-eşikleri, torbalar, aýakgaplar, beýleki harytlar bar.

Ahal welaýaty bilen bir hatarda, ýurdumyzyň ähli ýerlerinde-de hormatly Prezidentimiziň 28-nji iýulda sanly ulgam arkaly geçirilen Ministrler Kabinetiniň nobatdaky mejlisiniň barşynda mekdep harytlarynyň bazarlaryny alyjylar üçin amatly ýerlerde guramak we olarda mekdep harytlarynyň bolçulygyny üpjün etmek babatdaky tabşyryklaryndan ugur alnyp, 1-nji awgustdan başlap täze 2023 – 2024-nji okuw ýyly mynasybetli mekdep bazarlarynyň işi ýola goýuldy.