Her ýylyň 6-njy oktýabrynda Türkmenistan halky ähli uruşlarda we 1948-nji ýyldaky Aşgabat ýer titremesinde şehit bolan watandaşlaryny hatyralap, Hatýra gününi belleýär. Bu güni mynasybetli ýurduň ähli ýerlerinde aýat-töwir okalyp, sadakalar berilýär. Paýtagtymyzda ýerleşýän “Halk hakydasy” ýadygärlikler toplumynda gül goýmak dabarasy geçirilip, ýurdumyzyň garaşsyzlygy, azatlygy we parahat durmuşy ugrunda janyny gurban edenleriň öňünde baş egilýär.

Bu gün diňe bir ýitirenleri ýatlamak däl, eýsem türkmen halkynyň agzybirliginiň, ruhubelentliginiň we çydamlylygynyň nyşanydyr. 77 ýyl mundan ozal bolup geçen ýer titremäniň agyr yzlary halkyň ýüreginde hemişelik saklanýar. Şol pajygaly gije diri galanlar batyrlyk we ynsaplylyk görkezdiler. Häzirki döwürde bolsa, gözel paýtagtymyz Aşgabat ak mermerli şäher hökmünde parahatlygyň we abadançylygyň mekanyna öwrüldi.

Hatýra güni halkymyzyň geçmişine hormat goýmagyň, gahryman ata-babalarymyzy hatyralap, nesilleri watançylyk, agzybirlik ruhunda terbiýelemegiň mukaddes nyşany bolup durýar.

Leýli MOMMYÝEWA,

Seýitnazar Seýdi adyndaky Türkmen döwlet
mugallymçylyk institutynyň 3-nji ýyl talyby.