2025-nji ýylyň 4-nji aprelinde Türkmenistanyň Tokiodaky Ilçihanasy Ýaponiýanyň Dostlukly alyş-çalyş geňeşi bilen bilelikde «2025 – Halkara parahatçylyk we ynanyşmak ýylyna» bagyşlanan medeni forumy geçirildi. Bu barada Türkmenistanyň Daşary işler ministrligi habar berdi.

Forumda çykyş eden Türkmenistanyň Ýaponiýadaky ilçisi A.Baýramow ýurdumyzyň Bitaraplyk ýörelgelerine esaslanýan daşary syýasatyny üstünlikli alyp barýandygyny belledi. Şeýle hem ol Türkmenistanyň dünýäde parahatçylygyň, durnukly ösüşiň we halkara hyzmatdaşlygyň ilerledilmegine uly goşant goşýandygyny nygtady. Ilçi BMG we beýleki halkara guramalar tarapyndan öňe sürülýän başlangyçlaryň, şol sanda 2025-nji ýylyň “Halkara parahatçylyk we ynanyşmak ýyly” diýlip yglan edilmeginiň munuň aýdyň subutnamasydygyny aýtdy.

Şeýle-de, ilçi Ýaponiýanyň Hökümetine Türkmenistanyň we Ýaponiýanyň arasyndaky dostluk gatnaşyklaryny berkitmäge goşan goşandy hem-de yzygiderli goldawy üçin çuňňur minnetdarlygyny beýan etdi.

Forumyň dowamynda gatnaşyjylar Türkmenistanyň baý medeniýetine, däp-dessurlaryna hem-de halk döredijiligine degişli maglumatlar bilen tanyşdylar.

Arslan GULBAÝEW,

S.A.Nyýazow adyndaky Türkmen oba
hojalyk uniwersitetiniň talyby.