Ermenistan türkmen tebigy gazyny satyn almak mümkinçiligini seljerýär we bu ugurda häzirki wagtda “Türkmengaz” döwlet konserni bilen gepleşikler geçirilýär. Bu barada Ermenistanyň Premýer-ministriniň geňeşçisi Artaşes Tumanýan habar berdi.

Deslapky ylalaşyga laýyklykda, tebigy gaz Eýranyň çäginden “swap” usuly arkaly iberilip, 600 milliondan 1 milliard kubmetre çenli möçberde satyn almak meýilleşdirilýär.

Mundan başga-da, habarda türkmen tebigy gazyny Ermenistanyň üsti bilen Gruziýa üstaşyr geçirmek mümkinçiliginiň hem göz öňünde tutulýandygy bellenilýär. Gruziýa bu hyzmatdaşlyga taýýardygyny mälim etdi. Bu ugur Gara deňiz sebitindäki ýurtlaryň energiýa üpjünçiligi üçin täze mümkinçilikleri açyp biler.

Häzirki wagtda Ermenistan “Elektroenergiýa çalşylýan gaz” maksatnamasynyň çäginde Eýrandan tebigy gaz import edýär. Ýurduň milli gaz üpjünçilik ulgamyna bolsa “Gazprom Ermenistan” kompaniýasy hyzmat berýär.

Aýbölek PERDÄÝEWA,

Myrat Garryýew adyndaky
Türkmenistanyň Döwlet lukmançylyk
uniwersitetiniň Medisina ekologiýasy we
gigiýena kafedrasynyň mugallymy.