Türkmen agyr atletikaçylary Peru döwletiniň paýtagty Lima şäherinde geçirilen ýetginjekler (U17) we ýaşlar (U20) arasynda dünýä çempionatynda üstünlikli çykyş edip, jemi 12 medal gazandylar. Bu halkara ýaryşa 77 ýurtdan 531 türgen gatnaşdy.

Türkmenistanyň adyndan ýaryşa jemi 7 türgen gatnaşdy: ýaşlar toparynda 4 oglan, ýetginjekler toparynda bolsa 3 gyz çykyş etdi. Olardan bäşisi ýurdumyzyň hasabyna 2 altyn, 7 kümüş we 3 bürünç medal getirmegi başardy. Gazanylan 12 medalynyň onusy ýetginjekleriň (U17) arasyndaky ýaryşda alnan netijelerdir.

Şeýle hem, geçen ýyl şol bir şäherde — Lima şäherinde geçirilen ýetginjekleriň dünýä çempionatynda türkmen türgenleri 7 medal (3 altyn, 1 kümüş, 3 bürünç), Ispaniýada geçirilen ýetginjekler dünýä çempionatynda bolsa 4 medal (3 altyn we 1 bürünç) gazanypdylar.